«Заря» аяқ киім кәсіпорыны облыстық Кәсіпкерлер палатасының қолдауымен өндіріс аясын кеңейтіп, аяқ киім шеберханасын ашқан, деп хабарлайды Күнгей.kz тілшісі.
«Заряның» басшысы – Әлімжан Ибраймов. Ерінбеген етікші болады дегендей, өзі де осы етік тігу өнерімен 30 жылға жуық айналысқан. Осы кәсіптің қыр-сырын меңгерген іскер азамат.
Бүгінде ол маңайына ісіне мығым, алтын қолды еңбекқор шеберлерді жинаған. Кәсіпорынның екі шеберханасын қосқанда қазір 30-ға жуық адамды жұмыспен қамтып отыр. Жұмыстың жандануына мемлекеттің де қолдауы қомақты дейді өзі.
– Кәсіпкерлер палатасының көмегімен 10 млн теңге көлемінде 5 жылға несие алдым. Оның 7 пайызын мемлекет, 7 пайызын өзіміз төлейміз. Сол қаражатқа шетелден су жаңа станок алып, керек-жарағымызды түгендедік. Сондай-ақ «Даму» қоры өнімдерімізді көрмелерге тұрақты түрде қатыстырып, клиент санының күрт артуына септігін тигізді, – дейді кәсіпорын басшысы.
«Заряның» жаңадан ашылған бұл бөлімшесінде аяқ киімнің 300-ге жуық түрі бар. Түр-сипаты көз тартатын туфли, тапочка, спорттық аяқ киімдер, макасилер. Оның ішінде ерлер аяқ киімінің түрі — 250, әйелдерге арналғаны — 15, сондай-ақ балалар үшін — 20. Балалар демекші, алда мезгілге сай балаларға арналған ортопедиялық аяқ киімдер де шығарылмақшы. Көкпаршыларға арналған тізеге дейін жауып тұратын керзі етіктер де сатылымда.
Пікір қалдыру