Шымкентте «Алтын жас-Золотой возраст» деген атаумен қарттар күні аталып өтті

Шымкенттегі Орталық саябақта салауатты өмір салтын қалыптастыру мақсатында «Алтын жас-Золотой возраст» деген атпен Қарттар күні аталып өтілді. Облыстық денсаулық сақтау басқармасы ұйымдастырған шараға облыс әкімі Ж.Түймебаев арнайы келіп, ардагерлерді мерейлі мерекесімен құттықтап кетті.

суреттер www.inform.kz чайтынан алынды

Бұл күні қарияларға ерекше құрмет көрсетіліп, сый-сияпаттар тапсырылды. Сондай-ақ, саябаққа келген қарияларды медициналық жолдамасыз облыстың білікті дәрігерлері тегін диагностикалық тексеруден өткізіп, кеңестерін берді. Оларға  стоматологтар, кардиологтар, терапевтер, эндокринологтар мен окулистер қызмет көрсетті. Зейнеткерлер қан қысымдарын өлшетіп, көздерін көрсетті, УДЗ аппаратының көмегімен ағзасын тексертіп, экспресс-анализдер тапсырды. Саябаққа жиналған жұрт концерттік бағдарламамен қатар ардагерлер арасында өткен шахмат турнирінің куәсі болды. Көтеріңкі көңіл-күй сыйлауға ұмтылған мың бұралған кәсіби бишілер, әншілермен жарыса облыстағы ынтымағы жарасқан барлық этнос өкілдері өз тілдерінде әндер шырқады. Қазан айының алғашқы күні Шымкенттің шырайы ардагерлермен ажарлана түскені анық. Күні кеше, 30 қыркүйекте егде жастағы адамдардың денсаулығын нығайту және салауатты өмір дағдыларын қалыптастыру мақсатында облыс көлемінде аурухана, емханаларда «Ашық есік» күндері ұйымдастырылған болатын. Мұндай шара 7 қазанда да жалғасын табады. Ал 1 қазаннан бастап бір ай көлемінде облыс бойынша Ұлы Отан соғысының ардагерлеріне медицина қызметкерлері үйлеріне барып, медициналық көмектер көрсетеді.

 

Бірінші болып пікір қалдырыңыз

Пікір қалдыру

Сіздің эл.почтаңыз сайтқа ашық жарияланатын болмайды.


*