«ТҮРКІСТАН ҚҰПИЯЛАРЫ» ФИЛЬМНІҢ ТҰСАУЫ КЕСІЛДІ


Бүгін Түркістан қаласында облыстық мәдениет басқармасы «Оңтүстікфильм» мекемесінің ұйымдастыруымен «САҚ» киностудиясы түсірген «Түркістан құпиялары» сюжетті-деректі фильмінің тұсауы кесілді.

Салтанатты шараға «Нұр Отан» партиясы Түркістан облыстық филиалы төрағасының бірінші орынбасары Бейсен Тәжібаев, Түркістан облыстық мәдениет басқармасы Мәдениет және өнер бөлімінің басшысы Гүлнұр Советханқызы, «Оңтүстікфильм» мекемесінің басшысы Райхан Нарикова, «САҚ» киностудиясының директоры Нуриддин Паттеев, «Түркістан құпиялары» сюжетті-деректі фильмінің режиссері Батырхан Дәуренбеков, Түркістан қаласының зиялы қауым өкілдері мен БАҚ өкілдері қатысты.

Тұсаукесердің ашылу салтанатында сөз алған Түркістан облыстық мәдениет басқармасы Мәдениет және өнер бөлімінің басшысы Гүлнұр Советханқызы тарихи тылсымға толы киелі мекеннің сіз бен біз білмейтін құпиялары деректі фильмге арқау болғанын тілге тиек етті. Сонымен қатар түсіру тобына ерекше алғысын білдірді.

Ал келесі сөз кезегін алған «САҚ» киностудиясының директоры Нуриддин Паттеев «Түркістан өңірінің сіз бен біз білмейтін тарихи тылсымға толы құпиялары өте көп. Сондықтан «Түркістан құпиялары» фильмінің түсіріліміне тарих ғылымдарының докторы, профессор Жамбыл Артықбаев арнайы қатысып, кеңесші болды. Фильмнің әр сюжеті құпия. Бәрі белгілі болса онда қызық болмас еді», — деді.

Рас, фильмде бояулар құпиясы, «Тайқазан» құпиясы, Ясауи туралы, бала Ахметтің Арыстанбабтан алған аманат құрмасының сыры секілді тың ақпарат көптеп қамтылған. Туристерді тарту мақсатында сюжеттерде тарихи киімдер кеңінен пайдаланып, кино секілді жасалған деректі фильм. Бір сөзбен айтқанда, BBC талабына сай етіп жасалған. Түсіру тобы фильмнің әлі де жалғасы бар екенін айтады.

Көрсетілімнен соң «Нұр Отан» партиясы Түркістан облыстық филиалы төрағасының бірінші орынбасары Бейсен Тәжібаев пен фильм режиссері Батырхан Дәуренбеков, дінтанушы, ғалым Досай Кенжетайұлы сөз сөйледі.

Айта кетейік, фильм Түркістан облысы әкімдігінің тапсырысына сәйкес, облыстық мәдениет басқармасының «Оңтүстікфильм» мекемесі мен жергілікті «САҚ» киностудиясы бірлесе отырып түсірілген. Жаңа туынды рухани астананың көпшілікке беймәлім құпияларын қамтып қана қоймай, көрерменнің Түркістанға деген жаңа көзқарасын қалыптастыруға ықпал етеді.

Үш тілде жарық көретін аталмыш фильмнің ұзақтығы — 24 минут. Сценарий авторы – Бақытжан Құлжабаев. Продюссері – Нуриддин Паттеев. Режиссері – Батырхан Дәуренбеков.

Түркістан облыстық мәдениет басқармасының баспасөз қызметі

Бірінші болып пікір қалдырыңыз

Пікір қалдыру

Сіздің эл.почтаңыз сайтқа ашық жарияланатын болмайды.


*