Мақтаарал ауданында суармалы егіншіліктің тұрақты жұмыс істеуіне қажетті жағдай жасау бағытындағы жұмыстар жалғасуда. Егістік алқаптарына судың уақытылы әрі қажетті көлемде жетуі тікелей каналдардың техникалық жағдайына байланысты. Сондықтан суару маусымында су өткізу жүйелерін бақылауда ұстап, туындаған мәселелерді дер кезінде анықтап, жедел шешу – ауыл шаруашылығы саласындағы маңызды міндеттердің бірі.
Осы бағытта аудан аумағындағы су өткізу қабілетінде мәселелер туындаған және ерекше бақылауды қажет ететін каналдардың жай-күйіне зерделеу жүргізілді. Мониторинг жұмыстарына аудан әкімінің орынбасары Нұрбол Саттаров, ауданның кәсіпкерлік және ауыл шаруашылығы бөлімінің басшысы Баязит Әлімқұл, сондай-ақ «Қазсушар» РМК Түркістан филиалы Мақтарал өндірістік бөлімшесінің басшысы Тоқберген Мейрбек қатысты.
Жауапты сала мамандарымен бірге К-20, К-18, К-19, К-16Б және К-15 (Целинный насос) каналдары қаралып, олардың қазіргі техникалық жағдайы жан-жақты зерделенді. Атап айтқанда, су өткізу мүмкіндігі, арналардың жай-күйі, су ағысына әсер ететін факторлар және судың суармалы алқаптарға уақытылы әрі қажетті көлемде жеткізілуіне ықпал ететін мәселелер назарға алынды.
Ауыл шаруашылығы үшін су – өндірістің негізгі ресурстарының бірі. Әсіресе суармалы егіншілік кеңінен дамыған Мақтаарал жағдайында каналдардың қалыпты жұмыс істеуі шаруалардың егістік жұмыстарын уақытылы жүргізуіне тікелей әсер етеді. Суару жүйесіндегі кез келген ақау немесе судың өткізілуіндегі кедергі егістіктің жағдайына кері ықпал етуі мүмкін. Осыны ескере отырып, мониторинг барысында су өткізу жүйелерінің үздіксіз жұмысын қамтамасыз етуге басымдық берілді.
Зерделеу кезінде каналдардың қалыпты жұмыс істеуіне кедергі келтіруі ықтимал бірқатар мәселелер назарға алынды. Әсіресе суару кезеңінде су тапшылығына жол бермеу, каналдардың су өткізу қабілетін сақтау және шаруалардың сұранысына сәйкес суды тұрақты жеткізу мәселелері талқыланды.
Анықталған кемшіліктер мен проблемалық учаскелер бойынша жауапты мамандарға тиісті тапсырмалар берілді. Әрбір канал бойынша нақты жұмыстарды ұйымдастыру, ақауларды жою және су өткізу қабілетін қалыпқа келтірудің тиімді жолдары қарастырылды. Бұл жұмыстардың нәтижесінде суару жүйесінің қалыпты жұмысын қамтамасыз етіп, егістік алқаптарына судың іркіліссіз жеткізілуіне жағдай жасау көзделіп отыр.
Мұндай бақылау жұмыстарының маңызы егін алқабындағы еңбекпен тікелей байланысты. Диқандар үшін тұқым себу, егісті күтіп-баптау, өнімнің өсіп-жетілуі секілді барлық кезеңдерде судың қажетті уақытта жеткізілуі маңызды. Сондықтан каналдардың жағдайын бір реттік зерделеумен шектелмей, олардың техникалық жай-күйін тұрақты бақылауда ұстау қажеттілігі айтылды.
Аудан әкімінің орынбасары Нұрбол Саттаров та суару инфрақұрылымының ауыл шаруашылығы үшін маңыздылығына тоқталды.
– Мақтаарал ауданы – суармалы егіншілік кеңінен дамыған өңірлердің бірі. Сондықтан каналдар мен гидротехникалық нысандардың үздіксіз жұмыс істеуі ауданның ауыл шаруашылығы саласы үшін аса маңызды. Осыған байланысты суару инфрақұрылымының жағдайын бақылау жұмыстары маусым барысында тұрақты түрде жүргізіліп отыруы керек, – деді Н.Саттаров.
Суармалы егіншіліктің тиімділігі тек егістік көлемімен емес, қолданыстағы су инфрақұрылымының жағдайымен де өлшенеді. Осы тұрғыдан алғанда каналдарды уақытылы қарап, проблемалық учаскелерді анықтау және олар бойынша нақты шаралар қабылдау – шаруалардың еңбегін қолдаудың маңызды тетігі.
Қазіргі таңда жауапты мекемелер тарапынан проблемалық учаскелер бойынша тиісті жұмыстар қолға алынып, олардың орындалу барысы бақылауда тұр.
Мақтаарал үшін су – жай ғана табиғи ресурс емес, ауылдың тіршілігі мен шаруаның еңбегін жалғайтын негізгі арна. Сондықтан суару жүйелерінің тұрақты жұмысын қамтамасыз ету, каналдардың техникалық жағдайын жақсарту және суды егістікке ысырапсыз жеткізу – ауданның ауыл шаруашылығының тұрақты дамуына тікелей ықпал ететін маңызды жұмыстардың бірі.
