Сәкен Сейфуллиннің 130 жылдық мерейтойы аясында Қ.А.Ясауи атындағы Халықаралық қазақ-түрік университетінде «Сәкен тұлғасы тарих төрінде» атты мерекелік іс-шара өтті. Бұл шара еліміздің әдебиеті мен мәдениетінде үлкен із қалдырған қазақтың ұлы ақыны, драматургі және қоғам қайраткері Сәкен Сейфуллиннің есімін ұлықтап, оның шығармашылық мұрасын еске алу мақсатында ұйымдастырылды. Мерекелік шараның басталуы ұлы тұлға туралы түсірілген деректі фильммен ашылды, онда Сәкен Сейфуллиннің өмірі мен шығармашылығы, оның қазақ әдебиетіндегі орны жайлы маңызды мәліметтер берілді.
Қала әкімінің орынбасары Мекенхан Қозыханұлы құттықтау сөзінде Сәкен Сейфуллиннің ұлт үшін атқарған еңбектерін ерекше атап өтті. Ол қазақ әдебиетінің дамуына елеулі үлес қосқан ұлы тұлғаның тек жазушы ғана емес, қоғам қайраткері ретінде де қалың қазақ жұртының мәңгілік рухани қазынасына айналғанын айтты. Әсіресе, оның патриоттық шығармалары мен ұлттық сана-сезімнің дамуына қосқан үлесі ел тарихында өшпес із қалдырғанын тілге тиек етті. Сондай-ақ, қала әкімінің орынбасары Сәкен Сейфуллиннің есімімен аталған білім ордаларын мадақтап, ұлы тұлғаның ізін жалғастырушы жастарға тілектестігін білдірді.
Мерейтойлық іс-шараға Түркістан қаласындағы білім беру жүйесінің басшылары, ардагер ұстаздар мен түлектер, сондай-ақ БАҚ өкілдері қатысты. Мектептің педагогикалық ұжымы мен қадірлі қонақтар үшін арнайы ұйымдастырылған кештің басты бөлігінде, Сәкен Сейфуллин есімімен аталған мектептің көркеюіне өз үлесін қосқан педагогтарға мерейтойлық төсбелгі табысталды. Бұл марапаттар оларды оқу-тәрбие ісіне қосқан зор еңбектері үшін арнайы берілді.
Мерекелік шараның маңызды сәттерінің бірі «Тағылымға толы білім ордасы» кітабының тұсау кесері болды. Бұл кітапта Сәкен Сейфуллин атындағы мектептің тарихы, оның қалыптасу жолы, және мектеп ұжымының жеткен жетістіктері туралы жан-жақты ақпарат берілген. Оқырман осы кітап арқылы білім ордасының құрылған күнінен бастап бүгінгі таңға дейінгі жетістіктеріне үңіліп, мектебіміздің білім саласындағы үлесін тереңірек түсінуге мүмкіндік алады.
Түркістан қаласындағы Сәкен Сейфуллин атындағы мектеп 1971 жылы ашылды. Осыдан бері мектеп қаламыздағы алдыңғы қатарлы білім ордасы ретінде танылып келеді. Мектептің алғашқы директоры Жарқынбек Құлбайымбетовтің айтуынша, білім ұясы қала тұрғындары мен өңірдің мәдениетіне үлкен үлес қосып келеді. Бұл мектепте оқушыларға сапалы білім мен саналы тәрбие беруде ұжым аянбай еңбек етуде.
Қазіргі таңда Түркістан қаласындағы Сәкен Сейфуллин атындағы мектепте 922 оқушы білім алып жатыр. Мектеп ұжымы сапалы білім беру жолында қажырлы еңбек етіп, жаңа заман талабына сай білім беру әдістерін қолдануда. Мектепте 126 мұғалім жұмыс істейді, олардың ішінде үш мұғалім «Ы.Алтынсарин» медалінің иегері атанған. Бұл мектептің жоғары білікті педагогикалық құрамының білім саласына қосқан зор үлесінің дәлелі.
Мектеп ұжымы тек оқушыларға білім ғана емес, сонымен қатар ұлттың мәдениетіне, тарихына, өнеріне деген құрметті де тәрбиелейді. Түркістан қаласының мәдениеті мен тарихы мектепте оқытылатын пәндерде, түрлі мәдени іс-шараларда басты орын алады. Мектептің оқушылары ұлттық өнер мен мәдениеттің қыр-сырын меңгеріп, қазақ халқының салт-дәстүрін сақтауға және насихаттауға белсене атсалысады. Бұл мектептің негізгі мақсаты — жас ұрпақты ұлттық құндылықтармен тәрбиелеу, рухани байлыққа баулу.
Сәкен Сейфуллин атындағы мектептің жетістіктері тек білім беру саласымен шектелмейді. Мектептің оқушылары түрлі ғылыми байқауларда, мәдени шараларда, спорттық сайыстарда белсенді қатысып, үлкен жетістіктерге қол жеткізіп келеді. Мұның барлығы мектеп ұжымының жан-жақты жұмыс істейтіндігі мен шығармашылыққа деген ұмтылысының нәтижесі болып табылады.
Елімізде Сәкен Сейфуллин есімімен аталған 33 мектеп бар. Бұл мектептер ұлы тұлғаның есімін ұлықтап, оның шығармашылығын әрі қарай дамыту мақсатында жұмыс істейді. Әрбір мектеп өз білім беру жүйесінде Сәкен Сейфуллиннің істері мен мұрасын балаларға жеткізіп, оларды оның еңбектеріне қызықтыруға, сол арқылы ұлттың білім мен мәдениетінің дамуында үлесін қосуда.
Мерекелік іс-шара барысында Сәкен Сейфуллиннің шығармашылығын насихаттау мақсатында көптеген шаралар ұйымдастырылды. Бұл тек оның есімін ұлықтау ғана емес, сонымен қатар бүгінгі ұрпаққа оның шығармаларын оқып, оған терең құрмет көрсету үшін жасалып отырған маңызды қадам болып табылады.
Ұлы ақынның шығармашылығы ұлттық мәдениетіміздің бір бөлшегі ретінде елімізде және шетелдерде кеңінен танылуы тиіс. Оның поэзиясы мен қоғамға деген көзқарасы қазақ халқының рухын көтеретін, ертеңгі күнге үміт сыйлайтын шығармалар болып қала береді. Сондықтан Сәкен Сейфуллиннің 130 жылдық мерейтойын атап өту — ол тек әдебиет пен мәдениетімізге ғана емес, еліміздің болашақ ұрпағына да үлкен тәрбие.
Пікір қалдыру