Спорттың саулық кепілі екені баршамызға белгілі. Десек те, көпшілігіміз спортпен айналысуды тұрақты түрде дағдыға айналдыра алмай жүргеніміз тағы жасырын емес. Оның түрлі себептері де жетерлік. Бұл тұрғыда, үлкендер жағын айтпағанның өзінде, жастардың алдынан да көптеген кедергілер көлденеңінен шығып жатады. Жастарды спортқа баулу – жарқын болашақ кепілі. Сондықтан бұл тұрғыдағы атқарылар жұмыстарды жандандыру аса маңызды. Әрі кезек күттірмейтін мәселе. Болашағымыз деп үміт артқан жастарымыздың дені ғаламтордың шырмауынан шыға алмай жатқаны да көңіл құлазытпай қоймайды. Ғавламтор жетегінде кетпей, жастарымых спорттық сайыстардың жанынан табыып, денсаулығына мән беріп жүргентері қуаньарлық жайт.
Халықаралық студенттер күніне орай, Шымкент университетінде «Денсаулық – зор байлық» атты ұлттық спорттың бес түрінен университет аралық спартакиада өтті. Студенттердің басын қосқан дүбірлі додаға Мардан Сапарбаев атындағы Оңтүстік Қазақстан гуманитарлық институты, Қожа Ахмет Яссауи атындағы Халықаралық қазақ-түрік университеті, Жұмабек Тәшенов университеті, Аграрлық-техникалық колледж, «Авимед» көпсалалы колледждің студенттері қатысты.
– Шымкент университетінің басшылығымен ұйымдастырылған университет аралық спартакиадада ләңгі тебу, арқан тартыс, тоғызқұмалақ, қол күрес, гір тасын көтеру ойындарынан жеті команда бақ сынады. Ұлттық ойындарымызды дәріптеу арқылы студенттер арасындағы достық қарым-қатынасты нығайту және олардың спортқа деген қызығушылығын арттырғымыз келді, – деді Шымкент университетінің дене шынықтыру және спорт кафедрасының меңгерушісі Мәжит Рүстемов.
Үміткерлердің арасында сайыстарда еліміздің Туын желбіретіп жүрген жастар да бар. Солардың бірі – Нұрболат Ергеш. Ол гір тасын көтеруден төрт дүркін әлем чемпионы атанған.
–Бала күнімен спортқа бейім болып өстім. Әр түрлі ойындарға қатысып, жеңімпаз атанған кездерім көп. Соның ішінен гір тасын көтеру жаныма жақын болғандықтан, тек осы спорт түрімен айналысып келе жатқаныма жеті жылға жуықтады. Осы уақыт аралығында Литва, Сервия, Будапешт, Өзбекстан мемлекеттеріне барып, бірінші орынды иемденгенмін. Бұрын он минутта гір тасын жетпіс мәрте көтерсем, бүгін 100 мәрте көтеріп, рекордты жаңартамын, – деді Шымкент университетінің студенті Нұрболат Ергеш.
Спартакиада кешке дейін жалғасады. Жеңімпаздар арнайы марапатталатын болады.
Пікір қалдыру