Шымкент қаласында тыңайтқыш өндіруге бағытталған жаңа инвестициялық жоба — «QazTurkMinerals» ЖШС іске қосылуға дайын. Аталған кәсіпорын агросекторды заманауи өніммен қамтамасыз етіп, елдің азық-түлік қауіпсіздігіне өз үлесін қоспақ.
Жоба Шымкенттің арнайы экономикалық аймағында (АЭА) жүзеге асырылып жатыр. АЭА инфрақұрылымдық мүмкіндіктер мен салықтық жеңілдіктер ұсыну арқылы бизнеске қолайлы жағдай туғызады. Бұл өз кезегінде жобаның қаржылық тиімділігі мен орнықты дамуын қамтамасыз етеді.
Инвестиция көлемі 500 миллион теңгені құрайтын өндіріс орны жылына 5 мың тонна жоғары сапалы тыңайтқыш өндіруге қауқарлы. Өндірістің негізгі бағыты — ауыл шаруашылығы дақылдары үшін тиімді және экологиялық қауіпсіз тыңайтқыштарды шығару. Бұл өнімдер ішкі нарықтағы сұранысты қамтамасыз етіп қана қоймай, елдің аграрлық әлеуетін арттыруға мүмкіндік береді.
Кәсіпорын 2 гектар аумақта орналасады және соңғы үлгідегі технологиялық желілермен жабдықталады. Бұл жабдықтар өнім сапасын жоғарылатып, өндіріс барысында экологиялық стандарттарды сақтауға жол ашады.
Жоба аясында 15 жаңа жұмыс орны ашылады. Бұл — жергілікті тұрғындар үшін қосымша табыс көзі мен тұрақты жұмыс орны. Сонымен қатар жаңа кәсіпорын өңір экономикасына серпін беріп, өнеркәсіптік өндірістің көлемін ұлғайтуға ықпал етпек.
«QazTurkMinerals» ЖШС тыңайтқыш өндірісін дамыту арқылы ауыл шаруашылығында өнімділікті арттыруды, жердің құнарлылығын сақтауды және экологиялық қауіпсіздікті қамтамасыз етуді мақсат етеді. Қазіргі таңда жер өңдеу мен егіншілікте сапалы тыңайтқыштарға деген сұраныс артып келе жатқанын ескерсек, бұл жоба өзектілігімен ерекшеленеді.
Жаңа кәсіпорынның іске қосылуы — Шымкент қаласының индустриялық-инновациялық даму жолындағы маңызды қадамдарының бірі. Бұл тек аграрлық секторды ғана емес, жалпы экономиканы әртараптандыру мен тұрақты өсімді қамтамасыз етудің нақты мысалы.
Пікір қалдыру