Шымкент қаласы Полиция департаментінде жеке құрам қызметкерлері үшін ерекше форматтағы іс-шара өтті. Мақсат – ұжымдағы моральдық-психологиялық климатты жақсарту, қызметкерлердің ішкі мотивациясын дамыту және командалық рухты нығайту. Осы мақсатта «Мүмкіндіктер дөңгелегі» деп аталатын тренинг-ойын ұйымдастырылды.
Бұл бастаманың ерекшелігі – қызметкерлерге үйреншікті дәрістерден бөлек, ойын түрінде ұсынылған жаттығулар арқылы өзін-өзі тануға, дамуға, күйзеліс пен мазасыздықты жеңуге жол ашуында. Сонымен қатар, патриоттық сезімдерді күшейту, мақсаттарды айқындау және кәсіби жауапкершілікті арттыру да басты назарда болды.
«Мүмкіндіктер дөңгелегі» ойыны бірнеше психологиялық және патриоттық мазмұндағы тапсырмалардан тұрды. Қатысушылар дөңгелекті айналдырып, түскен тапсырмаларды орындады. Бұл ойын барысына күтпеген элемент қосып, қатысушылардың қызығушылығын арттырды. Жаттығулар барысында әр қызметкер өз мүмкіндігін байқап қана қоймай, ұжымдық әрекет пен бір-біріне сенімділікті нығайта түсті.
Тренинг мазмұнында стрессті басқару, эмоцияны реттеу, тиімді коммуникация орнату, жеке және кәсіби мақсаттарды жоспарлау секілді тақырыптар қамтылды. Әр тапсырма қызметкерлердің ішкі әлеуетін ашуға, тұлғалық дамуын қолдауға бағытталды. Сонымен қатар, әрбір жаттығу полиция қызметкерінің қоғам алдындағы жауапкершілігін, ел қауіпсіздігін қорғаудағы рөлін еске салды.
Патриоттық мазмұндағы тапсырмаларға ерекше көңіл бөлінді. Қатысушыларға заңға құрметпен қарау, Отанға адал қызмет ету, кәсіби борышты орындаудағы адалдық пен жауапкершіліктің маңыздылығы жеткізілді. Мұндай бағыттағы тапсырмалар полицейлердің бойында мақтаныш сезімін оятып, қоғам алдындағы парызын сезіндіре түсті.
Қызметкерлердің айтуынша, мұндай формат күтпеген әрі қызықты болды. Олар үшін бұл жаттығулар кәсіби тұрғыдан ғана емес, жеке өмірде де пайдалы екені анықталды. «Біз әдетте қатаң тәртіп пен нақты регламентпен жұмыс істейміз. Ал мұндай тренингтер ұжымды біріктіріп, бір-бірімізді жаңа қырынан тануға мүмкіндік береді», – деді қатысушылардың бірі.
Департамент басшылығы мұндай шаралар тұрақты түрде өткізіліп тұратынын атап өтті. Психологиялық тұрақтылықты дамыту, моральдық ахуалды сақтау және ұжымда сенім атмосферасын құру – полиция қызметінің тиімділігін арттырудағы басты факторлардың бірі.
Осылайша, «Мүмкіндіктер дөңгелегі» ойыны қызметкерлер үшін тек ойын-сауық емес, кәсіби және жеке дамуға жол ашатын пайдалы құрал болды. Мұндай шаралар полицияның сапалы әрі нәтижелі қызметін қамтамасыз етуге септігін тигізіп, қоғам қауіпсіздігін сақтау ісінде маңызды рөл атқарады.
Пікір қалдыру