26 тамыз күні Шымкент қаласында ҚР Ішкі істер министрлігінің Ұлттық ұланына қарасты 6506 әскери бөлімінің жедел мақсаттағы 1-батальонының әскери қызметшілері қоғамдық тәртіпті күзету кезінде екі түрлі төтенше жағдайға тап болды. Әскери қызметшілердің қырағылығы мен шапшаң әрекеті бір азаматтың өмірін сақтап қалуға, сондай-ақ қала тұрғынына жоғалған ұялы телефонын қайтаруға мүмкіндік берді.
Алғашқы оқиға шамамен сағат 22:45-те Тамерлан тас жолы бойында орын алды. Кезекшілік атқарып жүрген топқа жүргінші келіп, көпірде көңіл-күйі ауыр жағдайда тұрған ер адамның бар екенін хабарлады. Кіші сержант Улан Акимбай бастаған қатардағы Алмас Сұлтанбек пен Нұрсұлтан Ерәжеп дереу көрсетілген жерге аттанды. Олар көпірге жеткенде азаматтың жағдайы күрт нашарлап, ұстамасы ұстап қалғанын анықтады.
Гвардияшылар алғашқы медициналық көмек көрсетіп, жедел жәрдем шақырды. Медициналық қызметкерлер жеткенше олар ер адамның жағдайын бақылауда ұстап, есін жиғанша жанында болды. Жедел әрі үйлесімді іс-қимылдың арқасында азаматтың өмірін сақтап қалуға мүмкіндік туды.
— Мұндай сәтте әрбір минут шешуші рөл атқарады. Ең бастысы – сабыр сақтап, дұрыс әрі тез әрекет ету. Бізге ең үлкен қуаныш – қолдан келген көмегіміздің нәтиже бергені, — деді кіші сержант Улан Акимбай.
Осы оқиғадан шамамен жарты сағат өткен соң, Теріскей шағынауданында тағы бір жағдай тіркелді. Патрульдік топқа жас қыз келіп, өзінің «Redmi 12» маркалы ұялы телефоны жоғалғанын айтып шағымданды. Патруль басшысы қатардағы Қуаныш Жұматай бастаған әскери қызметшілер дереу іздестіру шараларын бастап кетті.
Гвардияшылар айналадағы аумақты мұқият қарап, ықтимал жерлерді тексерді. Бірлескен әрі табанды ізденістің нәтижесінде жоғалған телефон табылып, сол күні кешке-ақ иесіне қайтарылды. Қыз жасаққа алғысын білдіріп, олардың жедел әрекетіне ризашылығын жеткізді.
Аталған екі оқиға да «Құқықтық тәртіп» жедел-профилактикалық іс-шарасы аясында болды. Мұндай жағдайлар Ұлттық ұланның әскери қызметшілері тек қоғамдық тәртіпті күзетіп қана қоймай, сонымен бірге азаматтарға нақты көмек көрсете алатынын дәлелдейді.
Шымкент тұрғындары гвардияшылардың күнделікті қызметі қаланың қауіпсіздігіне сенімді тірек екенін айтады. Ер адамның өмірін сақтап қалу және жоғалған телефонды иесіне қайтару – Ұлттық ұланның қоғам алдындағы жауапкершілігін, олардың қырағылығы мен халыққа жақындығын көрсететін жарқын мысалдардың бірі.
Пікір қалдыру