Шымкент қаласында Қазақстан Республикасының Ұлттық ұланы жауынгерлері ел Конституциясының мерейтойын салтанатты түрде атап өтті. 6506 әскери бөлімінде еліміздің Негізгі заңының 30 жылдығына арналған саптық жиын өтті. Іс-шара елжандылық рухына, Конституцияға деген құрметке және мемлекеттік жетістіктерге деген мақтанышқа толы болды.
Әскери бөлім командирі, полковник Марат Рахпанов жеке құрамға арнаған сөзінде Конституцияның қоғам үшін маңыздылығын атап өтті:
— «Конституция – бұл жай ғана баптар жинағы емес. Ол – тәуелсіздіктің іргетасы, әр азаматтың құқығы мен бостандығының кепілі. Біз, әскери қызметшілер, оның талаптарын құрметтеп, қорғауға міндеттіміз, елдің қауіпсіздігі мен тұрақтылығын қамтамасыз етеміз».
Салтанатты іс-шара барысында тәртібімен, жоғары кәсібилігімен ерекшеленген әскери қызметшілер алғыс хаттар мен грамоталармен марапатталды. Мемлекеттік Туды көтеру рәсімі ерекше сәт болды: бұл мәртебелі құқық туған күні Конституция күнімен сәйкес келген сержант Даулет Тосқараға берілді. Бұл символдық қадам сарбаздардың ерекше жігерін арттырды.
Сонымен қатар Ұлттық ұланның дамуына елеулі үлес қосқан ардагерлер де назардан тыс қалмады. Олардың антына адалдығы мен көпжылдық қызметі жас буынға үлгі болды.
Конституция күніне арналған мерекелік іс-шаралар Шымкент қаласындағы 6698 әскери бөлімінде де өтті. Мұнда да саптық жиын ұйымдастырылып, ерлігімен, тәртібімен ерекшеленген әскери қызметшілер марапатталды.
Осы күні шымкенттік гвардияшылар қоғамдық тәртіпті қамтамасыз етуде де өздерінің кәсібилігін көрсетті. «Құқық тәртібі» атты жедел-профилактикалық іс-шара барысында олар азаматтарға екі рет нақты көмек көрсетті.
Алғашқы оқиға кешкі сағат 22:45 шамасында Тамерлан тасжолы маңында болды. Патрульдік жасаққа белгісіз тұрғын келіп, көпірде ауыр эмоционалды жағдайда тұрған азамат бар екенін хабарлады. Кіші сержант Улан Акимбай мен қатардағы Алмас Сұлтанбек, Нұрсұлтан Ережеп көрсетілген жерге дереу аттанды. Олардан бұрын ер адамның құрысуы басталып кеткен. Гвардияшылар алғашқы медициналық көмек көрсетіп, жедел жәрдем шақырды. Дәрігерлер келгенше науқастың жағдайын тұрақтандыруға мүмкіндік туды.
— «Бір минутты да жоғалтуға хақымыз жоқ еді. Мұндай сәттерде бастысы – сабыр сақтап, шұғыл әрекет ету. Азаматқа көмектескенімізге қуаныштымын», — деді кіші сержант Улан Акимбай.
Екінші жағдай жарты сағаттан кейін Терісқей көшесі ауданында болды. Патрульдік жасаққа жас қыз келіп, өзінің «Redmi 12» маркалы ұялы телефоны жоғалғанын айтты. Жасақты басқарған қатардағы Қуаныш Жұматай маңайдағы аумақты тексеруді ұйымдастырды. Іздеу нәтижесінде телефон табылып, сол күні иесіне қайтарылды.
Бұл екі оқиға да гвардияшылардың қала көшелерінде үнемі болуының маңыздылығын көрсетті. «Құқық тәртібі» акциясы аясындағы патрульдік қызмет тек қоғамдық тәртіпті қамтамасыз етіп қана қоймай, тұрғындардың әскери қызметшілерге деген сенімін нығайтады.
Осылайша, Конституцияның 30 жылдық мерекесі күні Ұлттық ұлан әскери қызметшілері борышына адалдығын тек сап алаңында ғана емес, сонымен бірге нақты өмірлік жағдайда да дәлелдеді. Олар азаматтарға көмек көрсетіп, көшелердегі қауіпсіздікті қамтамасыз етіп, заңға деген құрмет пен елжандылықты күнделікті қызметінде паш етті.
Пікір қалдыру