Қазақстанда 1 қазан – Қарттар күні ерекше құрметпен аталып өтеді. Бұл күн – ел дамуына өлшеусіз үлес қосқан, кейінгі ұрпақты тәрбиелеп, мемлекеттің іргетасын қалауға атсалысқан аға буын өкілдеріне алғыс білдірудің, оларды ұлықтаудың жарқын көрінісі. Қоғамның рухани тірегі саналатын қарттарымызға деген сый-құрмет – елдігіміздің, адамгершілік пен ізгілікке негізделген ұлттық болмысымыздың айқын дәлелі.
Осы атаулы күнге орай Қазақстан Республикасы Ұлттық ұланының Шығыс Қазақстан облысы Өскемен қаласында орналасқан 6506 әскери бөлімінің жеке құрамы мен басшылық құрамы ардагерлерге арнайы құрмет көрсетті. Бұл — әскери бөлімнің қалыптасуы мен дамуына үлес қосқан, бүгінде зейнет жасында болса да, бөлім өмірінен қол үзбей, жас буынға ақыл-кеңесін айтып, үлгі көрсетіп жүрген ардагерлерге тағзым ету шарасы болды.
Іс-шара аясында бөлімнің әскери қызметшілері ардагерлердің үйлеріне арнайы барып, оларды Қарттар күнімен құттықтап, мерекелік алғыс хаттар мен естелік сыйлықтар табыс етті. Жылы жүздесу барысында ардагерлердің әскери өмір жолы, қызмет барысындағы жарқын сәттері, олардың тәжірибесі мен естеліктері тыңдалды. Ардагерлердің әрбір әңгімесі – әскери рух пен тәртіптің, Отанға деген адалдықтың шынайы көрінісі болды.
Барлығы 30-дан астам ардагерге құрмет көрсетілді. Олардың қатарында офицерлер, прапорщиктер, сержанттар мен қатардағы әскери қызметшілер бар. Бұл жандар өз кезінде ел тыныштығы мен қоғамдық тәртіпті қамтамасыз етуде қажырлы еңбек етіп, бүгінгі Ұлттық ұланның іргетасын қалаған ардақты азаматтар. Қызмет барысында көрсеткен кәсібилігімен, тәртіптілігімен, адалдығымен әскери бөлім тарихында өшпес із қалдырған бұл ардагерлер – Ұлттық ұланның шынайы мақтанышы.
Ардагерлердің көпшілігі бүгінде зейнет жасында болса да, қоғамдық жұмыстарға белсене араласып келеді. Әскери бөлімнің патриоттық іс-шараларына қатысып, жас сарбаздарға ақыл-кеңестерін беріп, оларды Отан алдындағы борышына адал болуға тәрбиелеуде. Әсіресе, әскери ант қабылдау, салтанатты сап түзеу сынды маңызды шараларда ардагерлердің қатысуы – жас сарбаздарға ерекше рух береді.
6506 әскери бөлімінің ардагерлер кеңесінің төрағасы Владимир Самарский бұл шараның маңызын былай деп атап өтті:
– Ардагерлерге қамқорлық көрсету – бұл тек парыз емес, бұл – әскери борышымыздың бір бөлігі. Бұл жандар – қазіргі Ұлттық ұланның негізін қалағандар. Олардың өмір жолы – бүгінгі ұрпақ үшін үлгі. Құрмет пен назар – біз үшін міндет. Біз ұрпақтар арасындағы алтын көпірді үзбей, аға буынның аманатына адал болуға тиіспіз.
Шара барысында ардагерлердің кейбірі көздеріне жас алып, көрсетілген құрметке ерекше ризашылықтарын білдірді. Олар өз сөздерінде ел тыныштығы мен әскери тәртіпті сақтаудағы ұжымдық рух пен достықтың, патриотизм мен жанқиярлықтың маңызын атап өтті.
Осындай іс-шаралар – ұрпақтар сабақтастығын нығайтатын, ұлттық сана мен патриоттық рухты көтеретін, қоғамда үлкенге құрмет, кішіге ізет көрсетудің жарқын үлгісі. Әскери бөлімнің бүгінгі сарбаздары да бұл кездесуден рухани азық алып, өздеріне үлкен мотивация жинады.
Қарттар күні – өткенге тағзым, ерлікке құрмет, болашаққа бағдар. Бұл күн – жас буынға тәрбие, үлгі-өнеге боларлық оқиға. Ұлттық ұланның осындай бастамалары патриотизм мен елге қызмет ету идеясын насихаттауда маңызды рөл атқаратыны сөзсіз.
Бүгінгі бейбіт өміріміздің негізінде кешегі ерлік пен табандылық жатыр. Ардагерлерге деген құрмет – тек бір күндік іс-шарамен шектелмейді. Ол – үздіксіз жалғасуы тиіс игі дәстүр. Себебі олар – тарихтың тірі куәгерлері, ұрпаққа жол көрсеткен шамшырақтар.
Пікір қалдыру