Қазақстан Республикасы ІІМ Ұлттық ұланының 6506 әскери бөлімінің әскери қызметшілері кезекті рет жоғары кәсіби дайындық пен қырағылық көрсетіп, азаматтардың өмірі мен мүлкін қорғауға үлес қосты.
Шымкент қаласының Қалдаяқов көшесі бойында патрульдеу кезінде әскери жасақ тұрғын үйлердің бірінде түтін шыққанын байқайды. Әскери жасақ бастығы қатардағы Шахан Серікпай оқиға туралы дереу патрульдік топтың бастығы қатардағы жауынгер Нұрғазы Қырықбайға хабар береді.
Тиісті пәрмен берілген соң, әскери жасақ бастығы патрульшілер Өмірзақ Жолдасбек және Елнұр Бекмаханмен бірге оқиға орнына шұғыл жетеді. Сол мезетте Төтенше жағдайлар қызметі (ТЖМ) қызметкерлері авариялық-құтқару жұмыстарын жүргізіп жатқан. Ұлттық ұлан жауынгерлері өрт сөндірушілермен бірлесіп, тұрғындарды жоғарғы қабаттардан эвакуациялауға қатысты. Азаматтар қауіпсіз жерге шығарылып, зардап шеккендер болған жоқ.
Сонымен қатар, әскери қызметшілер оқиға орнын қоршап, адамдар көп жиналмауы мен арнайы қызметтердің жұмысын кедергісіз жүргізуін қамтамасыз етті. Бұл шаралар тәртіп пен қауіпсіздікті сақтауға, төтенше жағдай кезінде үйлесімді әрекетті жүзеге асыруға бағытталды.
— Ұлттық ұланның әскери қызметшілері ретінде біз осындай жағдайларда тез әрекет етуге міндеттіміз. Түтінді көргенде ойлануға уақыт болмады, бірден көмекке жүгірдік, — деді әскери жасақ бастығы қатардағы жауынгер Шахан Серікпай.
Әскери қызметшілер мен ТЖМ қызметкерлерінің үйлесімді іс-қимылының арқасында эвакуация жұмыстары дүрбелеңсіз өтті. Қауіпсіздік шараларының тиімді ұйымдастырылуы тұрғындардың сенімін арттырды.
Ұлттық ұлан жауынгерлерінің шұғыл әрекеті тұрғындардың өмірін сақтау, қауіпті жағдайды болдырмау және құқық қорғау органдарының жұмысына қолдау көрсету бойынша кәсіби дайындықтың нақты мысалы болды. Осындай оқиғалар әскери қызметшілердің қоғам алдындағы міндетін, қырағылығын және жауапкершілігін тағы бір мәрте дәлелдейді.
Сондай-ақ, оқиға әскери қызметшілердің әлеуметтік жауапкершілігін, азаматтарға көмектесуге дайын екенін, төтенше жағдайға дайын болудың маңыздылығын көрсетеді. Ұлттық ұлан тұрғындар қауіпсіздігін қамтамасыз етуге бағытталған барлық шараларды жүйелі түрде жүзеге асырып, кез келген төтенше жағдайға дайын екенін іс жүзінде дәлелдеп келеді.
Бұл оқиға – Ұлттық ұланның қоғамдық тәртіп пен қауіпсіздікті сақтау жолындағы кәсіби іс-қимылының нақты көрінісі, халыққа сенімділік пен тыныштық сезімін беретін маңызды әрекет болып саналады.
Пікір қалдыру