Елімізде соңғы жылдары аутизмге шалдыққан балалар саны көбейе бастады. Дамуы тежелген балалар айналасындағы адамдармен араласа алмай, тұйықталады немесе бір қимылды жалықпай қайталай береді. Баланың бойынан қандай да бір ауытқушылық байқаған ата-ана не істеуі керек? Аутизмнің емі бар ма?
Шымкент қаласындағы аутизмге шалдыққан және ақыл-ой дамуы тежелген балаларға арналған орталықта 110 бала оңалтудан өтуде. Ем-шаралар еуропалық әдіспен жүргізіледі.
Мекеме сәуір айында іске қосылған. «Самұрық-Қазына» АҚ мен «Қазақстан халқына» қоры бірігіп ашқан 8 аутизм орталығының алғашқысы.
Мұнда АВА терапиясы, эрготерапия, кинезиотерапия, робототерапия, емдік дене шынықтыру, еңбек терапиялары, арт-терапия, музыкалық терапия, қыш-құмыра бұйымдарын жасау бағыттары қарастырылған. Сонымен қатар сенсорлық ықпалдасу, әлеуметтік-тұрмыстық бағдарлау, логопед, психолог және дефектолог мамандар қызмет көрсетеді.
Аутист балаларды өзін-өзі ұстауы мен мінез-құлқына қарап аңғаруға болады. Олар көзге тіке қарамайды, «көтер» деп қолға сұранбайды, қарны ашса да тамақ сұрамайды, бір жері ауырса оны сезбейді. Аутист баланың назарын бір жерге аудару өте қиын. Олар айтқан сөзге мән бермейді, сұраққа жауап бермейді, есімін атап шақырсаң қарамайды. Мұндай жағдайда ата-аналар баласын керең деп ойлайды.
Аутизмді әр ел өзінше емдейді, соған қарай әдістемелік негіздері де әртүрлі. Жиі кездесетіні – мінез-құлықтық емдеу. Бұл әдіс АҚШ-та кең таралған. Оның негізінде қажетті қылықты, әрекетті қалыптастыру үшін сыртқы жағдайларды арнайы қамтамасыз ету, әлеуметтік-тұрмыстық бейімделу, сөйлеу тілін дамыту, оқу немесе еңбек ету дағдыларына үйретуге болады. Аталған әдіс бойынша оқытылған балалардың 50-60 пайызы жалпы мектеп бағдарламасын меңгеріп, кейін орта, жоғары оқу орындарында оқуын жалғастырады.
Пікір қалдыру