Түркістан өңіріне 2024 жылдың 9 айында 700 мыңнан астам қонақ келгені белгілі болды. Бұл жөнінде бүгін өңірлік коммуникациялар қызметінде өткен брифингте Түркістан облысының Туризм басқармасының басшысы Нұрдәулет Медеуов мәлімдеді. Оның айтуынша, өңірдің туристік әлеуетін арттыру бағытында бірқатар іс-шаралар қолға алынып, нақты жобалар жүзеге асырылуда.
– Өңірге келушілер қатарын көбейтіп, туристерге қолайлы жағдай жасау үшін әлі де ауқымды жұмыстар атқарылуы тиіс. Осыған орай биыл 26 тамызда облыс әкімінің төрағалығымен арнайы мәжіліс өткізіліп, өңірдің туризмін дамытуға арналған жол картасы бекітілді. Бұл құжатта туристік нысандардың инфрақұрылымын жетілдіру, қызмет көрсету сапасын арттыру, маркетинг бағытындағы шараларды күшейту және аудан-қала әкімдіктерінің жұмысын жандандыру сынды маңызды тармақтар қарастырылды. Жол картасының нәтижесінде 2025 жылдың қорытындысымен ішкі туристер санын 25%-ға, ал шетелдік туристердің санын 2,5 есеге арттыру, сондай-ақ туризм саласындағы қызмет көлемін 30%-ға дейін жеткізу жоспарланып отыр, – деді басқарма басшысы.
Нұрдәулет Медеуов брифинг барысында халықаралық деңгейде туристердің назарын аударуға бағытталған «GET LOST WIZZ AIR» жобасын да таныстырды. Жобаның ерекшелігі – 180 саяхаттаушы-блогер ұшақ бортында құпия бағытқа жол тартып, белгісіз қалаға қонған кезде ғана саяхат нысанын біледі. Яғни, жоба қатысушылары үшін сапардың соңғы нүктесі жұмбақ болып келеді. Мұндай форматтағы шаралар әлемнің бірнеше елінде сәтті жүзеге асқан. Мысалы, «Wizz AIR» әуе компаниясы Бішкекке бағытталған ұқсас жобаны іске асырып, туристік ағынды жаңа деңгейге шығарған. Қазіргі таңда Түркістан облысы тарапынан «Wizz AIR» компаниясымен алдын ала келіссөздер жүргізілуде. Тұжырым бойынша, ұшу шығындарын әуе компаниясы өзі көтереді. Егер жоба сәтті жүзеге асса, Түркістан аймағы жаңа аудиторияға танылып, өңірдің шетелдік туристер арасындағы имиджі айтарлықтай артуы мүмкін.
Спикердің айтуынша, 2024 жылдың алғашқы 8 айының қорытындысымен туризм саласындағы негізгі капиталға тартылған инвестиция көлемі 43,6 млрд теңгені құраған. Жыл соңына дейін бұл көрсеткішті 49,3 млрд теңгеге жеткізу көзделіп отыр. Инвестиция көлемінің артуы өңірдегі қонақүйлер мен демалыс орындарының сапасын жақсартуға, сервистік қызмет деңгейін көтеруге ықпал етеді. Бұл өз кезегінде туристік сұранысты арттырып, салаға жаңа жұмыс орындарының ашылуына, өңір экономикасының жандануына септігін тигізеді.
Қазіргі таңда Түркістан облысы тарихи-мәдени нысандарға бай, сонымен қатар табиғи көрікті жерлері де аз емес. Киелі мекенге келген қонақтар Қожа Ахмет Ясауи кесенесі мен шаһардың жаңартылған инфрақұрылымын тамашалап, облыстағы сан алуан туристік бағыттармен таныса алады. Сала мамандары агротуризм, экотуризм, медициналық және спорттық туризмді дамыту арқылы өңірдің тартымдылығын арттыруға басымдық беріп келеді. Осы ретте жергілікті кәсіпкерлер мен инвесторларға да жағымды жағдайлар жасалып, қажетті қолдаулар көрсетіліп жатыр.
Алдағы уақытта өңірде жаңа қонақүйлер мен хостелдер салу, гид-экскурсия қызметін жетілдіру, туристерге арналған ақпараттық орталықтарды көбейту, онлайн-қызметтер мен цифрлық технологияларды енгізу жоспарланған. Сондай-ақ халықаралық көрмелерге қатысу, шетелдік туроператорлармен ынтымақтастықты нығайту, маркетингтік стратегияларды жетілдіру сынды шаралар да күн тәртібінде тұр.
Жоғарыда аталған бастамалар мен жобалар біртіндеп іске асса, Түркістан облысы алдағы жылдары отандық және шетелдік туристер үшін ерекше тартымды орталыққа айналмақ. Халықаралық брендтермен бірлесе жұмыс істеу, инфрақұрылымды жаңарту, туристік пакеттерді әртараптандыру өңірдің халықаралық аренадағы беделін нығайтып, оның экономикасына оң әсер ететіні сөзсіз. Осылайша, туризм саласына құйылған инвестициялар мен қолға алынған жүйелі шаралар нақты нәтижелерге ұласып, Түркістан облысы ел ішіндегі ғана емес, шетелдік саяхатшылар үшін де қызықты, танымал және қолайлы туристік бағытқа айналады.
Пікір қалдыру