Шымкент қаласының өндірістік әлеуетін арттыруға бағытталған тағы бір маңызды инвестициялық жоба Қала күні қарсаңында іске қосылды. Бүгін алюминий профильдерін өндіретін заманауи «Himmel Aluminium» зауытының ашылу салтанаты өтті. Іс-шараға Шымкент қаласының әкімі Ғабит Сыздықбеков қатысып, жобаның өңір экономикасы үшін стратегиялық маңызын атап өтті.
Жалпы инвестициялық құны 3,5 миллиард теңгені құрайтын жоба өңдеу өнеркәсібін дамытуға және ішкі нарықты сапалы отандық өніммен қамтамасыз етуге бағытталған. Құрылыс және тұрғын үй-коммуналдық шаруашылық салаларында алюминий профильдеріне сұраныстың артуына байланысты жаңа өндіріс орны нарық қажеттілігін отандық өнім арқылы өтеуге мүмкіндік береді.
Зауыт толық қуатында жұмыс істеген кезде жылына 3,8 мың тоннаға дейін алюминий профильдерін өндіреді. Мұнда терезе, есік, витраж, қасбеттік жүйелер мен түрлі алюминий конструкцияларына арналған өнімдер шығарылады. Өнімдер Шымкент пен Түркістан өңірлерімен қатар еліміздің басқа да облыстарына жеткізілмек.
Кәсіпорынның іске қосылуы өңірдегі жұмыспен қамту көрсеткішіне де оң әсер етеді. Өндіріс орны толық іске қосылғаннан кейін 80 тұрақты жұмыс орны ашылады. Сонымен қатар логистика, тасымалдау, қызмет көрсету және шикізат жеткізу салаларында қосымша жұмыс орындарының құрылуына мүмкіндік береді.
«Himmel Aluminium» зауытының ашылуы – жаңа өндіріс орнының іске қосылуы ғана емес, Шымкенттің индустриялық дамуына серпін беретін, импортты алмастыруға ықпал ететін және өңір экономикасының тұрақты өсімін қамтамасыз ететін маңызды инвестициялық жоба.
