Мақтаарал ауданында тұрғындарды баспанамен қамту бағытындағы жұмыстар жүйелі жалғасуда. Бүгін Жаңажол ауылдық округіне қарасты Фирдауси елді мекенінде жаңадан бой көтерген тұрғын үйлердің алғашқы легі пайдалануға беріліп, 52 отбасы көптен күткен қоныс тойын тойлады.
Жобаның жүзеге асуы Қазақстан Республикасы Үкіметінің №736 қаулысымен бекітілген «Тұрғын үй-коммуналдық инфрақұрылымды дамытудың 2023–2029 жылдарға арналған тұжырымдамасы» аясында мүмкін болды. Жалпы бұл аумақта 100 тұрғын үйдің құрылысы толық аяқталған. Оның алғашқы 52-сі «Отбасы банк» АҚ арқылы тұрғын үй кезегінде тұрған әлеуметтік жағынан осал санаттағы азаматтар мен көпбалалы отбасыларға берілді.
Салтанатты рәсімге Мақтаарал ауданының әкімі Бақыт Асанов қатысып, жаңа қоныс иелерін құттықтап, баспана – әрбір отбасының тұрақтылығы мен әл-ауқатының кепілі екенін атап өтті.
«Бүгін көптеген отбасының көптен күткен арманы орындалып отыр. Өз шаңырағына қол жеткізу – әр азамат үшін ерекше қуаныш. Баршаңызды жаңа қоныстарыңызбен шын жүректен құттықтаймын! Әр үйден береке кетпесін, шаңырақтарыңыздан шаттық пен бақыт арылмасын», – деді аудан әкімі.
Жаңа тұрғын үйлер барлық қажетті инженерлік инфрақұрылыммен толық қамтамасыз етілген. Атап айтқанда, табиғи газ, электр энергиясы, ауыз су және кәріз жүйесі жүргізілген. Сонымен бірге тұрғын үй аумағы абаттандырылып, асфальт жолдар төселіп, кіреберіс жолдар толық ретке келтірілген.
Әрбір үйдің жалпы аумағы 63 шаршы метрді құрайды. Баспаналарда кіреберіс, үш тұрғын бөлме, ас үй және санитарлық торап қарастырылған. Сондай-ақ әр отбасыға 7 сотық жер телімі беріліп, жеке қосалқы шаруашылықпен айналысуға мүмкіндік жасалған.
Жаңа қоныс иелері мемлекет тарапынан көрсетіліп отырған қолдау үшін алғыстарын білдіріп, бұл күннің өздері үшін ұмытылмас қуаныш екенін жеткізді.
Айта кетейік, Фирдауси елді мекеніндегі жаңа шағын аудан алдағы уақытта одан әрі дамытылады. Мұнда спорт және ойын алаңдарын, мәдениет үйін салу жоспарланған. Сонымен қатар, «Жаңажол ауылдық округі әкімінің аппараты» мемлекеттік мекемесі де осы елді мекендегі жаңа әкімшілік ғимаратқа көшіп, өз жұмысын жаңа орында жалғастыруда.
