Созақ ауданындағы өндірістік әлеуеттің қалыптасуы мен дамуы халықаралық деңгейдегі ірі жобалармен тығыз байланысты. Соның бірі – Қазақстан мен Франция арасындағы ұзақ жылдарға негізделген сенімді әріптестіктің нақты нәтижесін көрсетіп келе жатқан «KATCO» қазақ-француз бірлескен кәсіпорны. Биыл компания өзінің 30 жылдық мерейтойын атап өтті.
Айтулы датаға арналған мерекелік іс-шара кәсіпорынның «Шаңырақ» вахталық лагерінде ұйымдастырылды. Салтанатты жиын компанияның отыз жылдық даму жолын қамтыған мерейтойлық бейнероликпен басталып, «Фараб» би ұжымының қазақ ұлттық биімен жалғасты.
Мерейтойлық шараға Түркістан облысы әкімінің бірінші орынбасары Зулпыхар Жолдасов, Созақ ауданының әкімі Мұхит Тұрысбеков, Францияның Қазақстандағы Төтенше және Өкілетті Елшісі Сильван Гиоге, Қазақстан Республикасы Атом энергиясы жөніндегі агенттігі төрағасының орынбасары Асет Махамбетов, Orano Директорлар кеңесінің төрағасы Клод Имовэн, «Қазатомөнеркәсіп» ҰАК» АҚ Басқарма мүшесі Дастан Кошербаев және «KATCO» Бас директоры Закариа Эль Марзуки қатысты.
Жиын барысында кәсіпорынның отыз жылдық даму тарихы, Қазақстан мен Франция арасындағы өндірістік және технологиялық ынтымақтастықтың нәтижелері сөз болды. Сонымен қатар өндірістегі заманауи технологияларды қолдану, кәсіби мамандардың еңбегі, өндірістік мәдениет пен кәсіпорынның өңір экономикасына қосып отырған үлесі атап өтілді.
«KATCO» тарихы – Созақ ауданындағы өнеркәсіптің дамуымен қатар қалыптасып келе жатқан маңызды өндірістік тәжірибенің бірі. Кәсіпорынның жұмыс істеуі ауданның өндірістік әлеуетін арттырып қана қоймай, заманауи технологияларды енгізу, кәсіби кадрлардың біліктілігін жетілдіру және халықаралық тәжірибені жергілікті өндіріс үдерістеріне енгізу бағыттарының маңызын айқындай түседі.
Бүгінде өндірістік саясаттың негізгі міндеттерінің бірі – табиғи ресурстарды тиімді игерумен қатар, технологиялық мүмкіндіктерді кеңейту, өндіріс тиімділігін арттыру және жоғары білікті мамандардың әлеуетін пайдалану. Осы тұрғыдан алғанда, «KATCO»-ның үш онжылдықтағы тәжірибесі ауданның индустриялық даму бағыты үшін маңызды.
Компанияның мерейтойлық жиынында Қазақстан мен Франция тараптарының ұзақ мерзімді әрі сенімді серіктестігіне ерекше мән берілді. Мұндай ынтымақтастық өндірістік салаға жаңа технологиялар мен басқару тәжірибесін тартуға, халықаралық стандарттарға сай жұмыс жүргізуге және кәсіпорынның тұрақты дамуына мүмкіндік береді.
Созақ ауданы үшін өнеркәсіп тек экономикалық көрсеткіштердің көзі ғана емес, сонымен бірге жаңа жұмыс орындарын қалыптастыратын, мамандардың кәсіби біліктілігін арттыратын және заманауи өндірістік мәдениетті орнықтыратын маңызды бағыт. Сондықтан ірі өндіріс орындарының технологиялық жаңаруы мен тұрақты дамуы ауданның жалпы индустриялық әлеуетімен тікелей сабақтас.
Мерейтой барысында компанияның дамуына және өңірдің өркендеуіне елеулі үлес қосқан бірқатар азамат арнайы марапаттарға ие болды. Бұл – өндіріс саласындағы жетістіктің артында ең алдымен кәсіби мамандардың, инженерлер мен жұмысшылардың еңбегі тұрғанын көрсететін маңызды сәт.
«KATCO»-ның 30 жылдық тарихы – халықаралық серіктестіктің, технологиялық дамудың және кәсіби еңбектің сабақтастығын көрсететін кезең. Ал мұндай тәжірибе Созақ ауданындағы өнеркәсіптік әлеуетті одан әрі дамыту, инновациялық тәсілдерді енгізу және өндірісті жаңғырту бағыттарының маңызын арттыра түседі.
Мерейтойлық шара концерттік бағдарламамен жалғасып, Kultegin этно-ансамблі мен «Фараб» би ұжымының өнерпаздары өнер көрсетті. Осылайша өндіріс пен мәдениетті ұштастырған айтулы шара «KATCO» кәсіпорнының 30 жылдық белесіне арналған мерекелік жиын ғана емес, Қазақстан мен Франция арасындағы ұзақ мерзімді өндірістік серіктестіктің нәтижелерін саралаған маңызды басқосу ретінде өтті.
