Облыс орталығында жасөспірімдер арасында түрлі дәрежедегі спорттық сайыстар жүйелі ұйымдастырылуда.
Жарыс қалалық Балалар мен жасөспірімдер спорт клубының ұйымдастыруымен жасалды.
Кезекті қала біріншілігі жасөспірімдер арасында гандболдан өтті.
Екі күнге созылған жарыста 11-13 жас аралығындағы спортшылар қатысты.
Түркістан, Кентау қалалары мен Сауран ауданынан жиналған 120-дан аса спортшы қызықты ойын көрсетіп, кіл мықтыны анықтады.
Тартысты бәсекенің нәтижесі бойынша жерлестеріміз Ө. Жәнібеков атындағы мектеп оқушылары жиналған Түркістан командасы оқ бойы озып шығып, басжүлдені қанжығасына байлады.
Жүлделі екінші орынды кентаулық Махмуд Қашқари мектебінің командасы иеленсе, үшінші орынға Ахмет Байтұрсынов мектебінің (Түркістан қаласы) командасы жайғасты.
Қазір саламатты өмір салтын насихаттап, бұқаралық спортты дамыту айрықша маңызды. Әсіресе, балалардың спортпен айналысуына жағдай жасау қажет. Мұның бәрі халықтың денсаулығын жақсартуға мүмкіндік береді, – деп айтты Мемлекет басшысы Қасым-Жомарт Кемелұлы Тоқаев.
Жастарды спортқа баулу – жарқын болашақ кепілі. Сондықтан Президентіміз айтқандай бұл тұрғыдағы атқарылар жұмыстарды жандандыру аса маңызды. Әрі кезек күттірмейтін мәселе. Болашағымыз деп үміт артқан жастарымыздың дені ғаламтордың шырмауынан шыға алмай жатқаны да көңіл құлазытпай қоймайды. Қазіргі қоғам – жаңа ақпараттық технологиялардың қоғамы және XXI ғасырдың бұл ағымы – қоғам дамуының жаңа дәрежесіне жеткізді. Ақпарат алмасу, қарым-қатынас орнату, жұмыс іздеу, білім алу мүмкіндігі және тағы басқа іс-әрекеттер шынайы әлемге қарағанда виртуалды әлемде жүзеге асатын болды. Интернет жастардың ең сенімді құралдардың біріне айналды.
Пікір қалдыру