Шымкентте мың отбасыға көмек көрсетілді

Шымкент қаласында «Біз біргеміз» акциясы аясында мыңға жуық отбасыға көмек көрсетілді. Бүгін Шымкентте «Біз біргеміз!» республикалық акциясы аясында «Nur Otan» партиясының белсенді мүшелерінің демеушілігімен қайырымдылық шарасы өткізілді. Бұл акция Қасиетті Рамазан айындағы Ораза айт мерекесі қарсаңында халықтың аз қамтамасыз етілген топтарын қолдау мақсатында өткізіліп отырғанын айтады ұйымдастырушылар. Ізгі ниеттен туған бұл бастаманың шеңберінде Шымкент қаласында тұратын мыңға жуық мұқтаж отбасыға азық-түлік жиынтықтары табысталды. Көмекке шын мұқтаж жандардың тізімін жасауға қаладағы төрт аудан әкімдіктері мұрындық болған. Әкімдіктер тарапынан жасақталған аз қамтылған отбасылар тізімі бойынша азық түлік себеті таратылған. Бұл тізімде көпбалалы аналар, мүмкіндігі шектеулі жандар, жалғыз басты зейнеткерлер де бар. Мұқтаж жандарға көмекті «Nur Оtan» партиясы белсенділері мен «Jas Otan» жастар қанатының жастары және еріктілер сақтану шараларын ұстана отырып, «байланыссыз» тәсілмен жеткізіп берді. Алдағы уақытта да мұндай қайырымдылық шаралары жалғасатын болады.