2040 жылға дейінгі даму жоспары аясында Түркі дүниесінің рухани астанасының Бас жоспары қайта қаралуда. Бірақ сарапшылар бұл құжатта ең маңызды топ — балалар мен жастардың қажеттіліктері нақты көрініс таппағанын айтып, алаңдаушылық білдіруде.
Халықтың үштен бірі — балалар мен жастар
2025 жылдың шілдесіндегі дерекке сүйенсек, ежелгі қаланың тұрғындар саны шамамен 165 мың адамдықұрайды. Оның ішінде:
-
6 жасқа дейінгі балалар – 16 476 (9,99%)
-
7–18 жастағы мектеп оқушылары – 19 488 (11,81%)
-
19–30 жастағы жастар – 19 777 (11,99%)
Жалпы алғанда, шамамен 56 мың тұрғын — жас ұрпақ, яғни халықтың үштен бір бөлігіне жуығы балалар мен жастар екені анықталды.
Қаланың жаңа Бас жоспары:
-
жылу және ауызсу жүйелерін жаңарту,
-
жол инфрақұрылымын оңтайландыру,
-
тарихи мұраларды сақтау,
-
туризмді дамыту,
-
өмір сүруге қолайлы орта қалыптастыру сияқты басым бағыттарды қамтиды.
Болжам бойынша, 2040 жылға қарай халық саны 400 мыңға жетеді. Бұл жағдай қаланың тұрғын үймен қатар, сапалы әлеуметтік инфрақұрылыммен де қамтамасыз етілуін талап етеді.
Қазіргі жоспарларда:
-
тұрғын үй аудандарын кеңейту,
-
тарихи ескерткіштерді сақтау,
-
туризм кластерін дамыту қарастырылғанымен,
балалар мен жастарға арналған мектептер, балабақшалар, шығармашылық орталықтар жайлы нақты мәліметтер аз. Ал осындай жас құрылым кезінде білім, тәрбие және қауіпсіз орта бірінші кезектегі қажеттілікке айналады.
Сарапшы пікірі:
«Егер рухани астана мәртебесін нақты өмірде іске асырғымыз келсе, ең алдымен жас ұрпаққа лайықты инфрақұрылым қалыптастыруымыз қажет. Бұл — мектеп, балабақша, секциялар мен мәдени орындар ғана емес, балалардың армандап, өсуіне жағдай жасау», – дейді урбанистика саласының тәуелсіз сарапшысы.
Облыс әкімі Нұралхан Көшерұлы Бас жоспардың ерекше мәртебеге сай болуы тиіс екенін баса айтты:
«Біздің шаһар – жай ғана әкімшілік орталық емес, бұл – күллі түркі әлемінің жүрегі. Бас жоспар мен дизайн-код халықаралық стандарттарға сай болуы қажет», – деді аймақ басшысы.
-
Қала халқының үштен бірі — балалар мен жастар.
-
2040 жылға қарай олардың саны 130 мыңға жуықтауы мүмкін.
-
Бұл балабақша, мектеп, шығармашылық орталықтар мен спорт алаңдарын бүгіннен жоспарлауды талап етеді.
-
Қаланың басты мақсаты – тарихи мұраны сақтау ғана емес, келешек буынды қалыптастыруға жағдай жасау болуы тиіс.
Ежелгі қала тарихпен ғана емес, балаларымен де болашаққа жол салады. Сондықтан да бүгінгі шешімдер ертеңгі ұрпақтың тағдырын анықтайды.
Пікір қалдыру