Түркістан қаласының жастары «Таза Қазақстан» экологиялық акциясы аясында тимбилдинг өткізді.
Түркістан қаласында елімізде бастау алған «Таза Қазақстан» экологиялық бастамасы аясында бірнеше қоғамдық-әлеуметтік шаралар ұйымдастырылды. Бұл іс-шаралар тұрғындардың экологиялық мәдениетін арттыру, қоршаған ортаға деген жауапкершілігін қалыптастыру, жастарды белсенділікке баулу мақсатында өтті. Акцияны Түркістан қаласының Қоғамдық даму басқармасына қарасты «Жастар ресурстық орталығы» ұйымдастырды.
Аталған шараға 100-ге жуық жас пен ерікті азаматтар қатысты. Олар қаланың бірнеше қоғамдық орындарында экологиялық сауалнама жүргізіп, тұрғындарға ақпараттық парақшалар таратып, қоршаған ортаны қорғау туралы түсіндірме жұмыстарын жүргізді. Қатысушылар «Біз таза қаланы қолдаймыз!», «Сен де #TazaQazaqstan2025 акциясына қосыл!» деген мазмұндағы ұрандарды көтеріп, экологиялық тазалықты сақтаудың маңызын көпшілікке жеткізді.
Экологиялық акция аясында тұрғындармен арнайы түсіндірме әңгімелер жүргізілді. Бұл бағыттағы жұмыс тек бір реттік емес, жүйелі түрде жалғасып жатқан бастаманың бір бөлігі. Жастар қоршаған ортаға бейжай қарамау, табиғатты аялау, қаланы таза ұстау – әрбір азаматтың парызы екенін атап өтті.
Шараның басты нүктелерінің бірі – «Жібек жолы» саябағында өткен сенбілік болды. Мұнда жастар мен еріктілер саябақ аумағындағы қоқыстарды жинап, көріктендіру жұмыстарын жүргізді. Олар тек тазалықпен шектеліп қоймай, өтіп бара жатқан тұрғындарға экологиялық сауаттылық жайында ақпарат беріп, тазалықты сақтау туралы үндеулер таратты.
Айта кетейік, мұндай іс-шаралар жастардың экологиялық санасын оятып қана қоймай, олардың арасындағы ынтымақтастықты нығайтуда маңызды рөл атқарады. Осыған орай ұйымдастырушылар тимбилдинг форматында түрлі қызықты ойындар мен командалық жаттығулар өткізді. Бұл ойындар жастардың бір-бірімен танысып, достасуына, командамен жұмыс істеу қабілеттерін дамытуға ықпал етті.
Жастар ресурстық орталығы өкілдерінің айтуынша, бұл бастама алдағы уақытта да жалғасын табады. Түркістан қаласының жас буыны «Таза Қазақстан» секілді әлеуметтік-экологиялық бастамаларға үнемі белсене қатысып, өздерінің белсенді азаматтық позициясын көрсетіп келеді. Олар қаланың көркеюіне, табиғи тазалығын сақтауға өз үлестерін қосуға дайын екендіктерін жеткізді.
Жалпы, мұндай шаралар арқылы жастардың табиғатқа деген сүйіспеншілігін арттырып, қоғам алдында жауапкершілік сезімін қалыптастыруға болады. Сонымен қатар, бұл іс-шаралар Түркістан қаласын таза әрі жайлы өмір сүруге қолайлы қала ретінде дамытуға бағытталған кешенді жұмыстың бір бөлігі болып табылады.
Пікір қалдыру