Қоғамның тыныштығы мен азаматтардың қауіпсіздігін қамтамасыз ету – кез келген елдің басты мақсаты. Осы орайда бұл жауапты міндетті иығына артқан полиция қызметкерлерінің еңбегі өлшеусіз. Олар күндіз-түні тыным таппай, заңның үстемдігі мен тәртіптің сақталуы үшін аянбай тер төгуде. Солардың қатарында өмірін ішкі істер саласына арнаған ардагер полицей – Асылжан Алдашұлы Ошановтың есімі ерекше құрметке ие.
Асылжан Алдашұлы ішкі істер саласында 25 жылға жуық уақыт адал қызмет етіп, бүгінде зейнеткерлік демалыста. Ол өзінің қызмет жолын Жетісай аудандық ішкі істер бөлімінде бастап, жол-патрульдік полициясында, кейін ювеналдық полиция бөлімшесінде, сондай-ақ кезекші бөлімшенің аға жедел кезекшісі ретінде де еңбек етті. Қоғам тыныштығы үшін күн-түн демей, аптап ыстық пен ақ қар, көк мұзда да ел алдында жүрген оның қызметі – нағыз ерлік пен табандылықтың көрінісі.
Асылжан Алдашұлы – тек өз қызметімен ғана емес, адами қасиетімен де әріптестері мен жұртшылықтың ыстық ықыласына бөленген жан. Оның сабырлылығы, кәсібилігі, адалдығы жас қызметкерлерге әрдайым үлгі болды. Еңбегі бағаланып, түрлі марапаттар мен алғыс хаттарға ие болған ол, бүгінде зейнеткерлік демалыста жүрсе де, саладағы әріптестерімен байланысын үзбей, жас мамандарға ақыл-кеңесін беріп келеді.
Бұл азаматтың ең үлкен жетістігі – өзінің ізін жалғаған ұлы Бекзаттың да полиция қызметінде еңбек етуі. Бала кезінен әкесінің адал еңбегін көріп өскен Бекзат Асылжанұлы Ошан бүгінде ел тыныштығы мен қоғамдық тәртіпті сақтау жолында тер төгіп жүрген жас тәртіп сақшысы. Оның қызметке деген жауапкершілігі, тәртіпке деген адалдығы – отбасындағы тәрбиенің, әкенің өнегелі өмір жолының жарқын жемісі.
Полиция қызметі – жай ғана кәсіп емес, бұл – ел мен заң алдындағы борыш. Әке мен баланың бұл салада қатар еңбек етуі – тек отбасылық дәстүр ғана емес, қоғамға қызмет етудің биік үлгісі. Мұндай еңбек әулеттері – жас ұрпаққа елге, мемлекетке қалай адал қызмет ету керектігін үнсіз насихаттап тұрған тірі тарих іспетті.
«Полиция формасын киген әрбір азамат – заң мен тәртіптің айнасы. Бізге қарап, қоғам сенім артады, жастар бой түзейді. Сондықтан біздің әр ісіміз, әр қадамымыз – үлкен жауапкершілікпен өлшенуі керек», – дейді Асылжан Алдашұлы.
Қоғам мен заң алдындағы жауапкершілік – тек полицейдің емес, әрбір азаматтың борышы. Бірақ сол жауапкершіліктің салмағын нақты сезініп, өз өмірін соған арнайтын азаматтар аз емес. Осындай жандардың қатарында Асылжан Алдашұлы мен ұлы Бекзат бар. Олардың отансүйгіштігі, адал қызметі, ел алдындағы борышын абыроймен атқаруы – кейінгі буынға үлгі боларлық өнеге.
Ел тыныштығы жолында тынбай еңбек етіп жүрген полицейлердің еңбегі – елеулі әрі құрметке лайық. Қоғамдағы тәртіп пен тұрақтылық – олардың қажырлы еңбегінің нәтижесі. Асылжан Ошанов сынды ардагерлер мен олардың ізін жалғаған жас буын – бүгінгі қоғамның тыныштығы мен қауіпсіздігінің кепілі. Осындай еңбек әулеттері – Қазақстан полициясының беделін арттырып, ұлт алдындағы адал қызметтің мәңгілік үлгісі болып қала бермек.
Пікір қалдыру