21-23 шілде күндері аралығында Шымкент қаласы аумағында полиция қызметкерлерінің қатысуымен «Тасымалдаушы» атауымен ауқымды жедел-профилактикалық іс-шара басталды. Бұл шараның басты мақсаты – қоғамдық көліктердің қатысуымен болатын жол-көлік оқиғаларының алдын алу, жолаушылар тасымалын заң аясында реттеу, сондай-ақ заңсыз такси қызметін жүзеге асырып жүрген тұлғаларды анықтап, олардың әрекеттеріне тосқауыл қою.
Қазіргі таңда ірі қалаларда, соның ішінде Шымкентте де жолаушы тасымалы саласында көптеген заң бұзушылықтар тіркеліп отыр. Әсіресе жеке автокөлік иелерінің такси ретінде тіркелмей, рұқсатсыз жолаушы тасымалдау әрекеттері жиілеген. Мұндай көлік құралдары көбіне техникалық тексерістен өтпеген, жүргізушілері қажетті медициналық тексерулерден өтпеген болуы мүмкін. Бұл жолаушылардың өміріне қауіп төндіреді.
Сонымен қатар, кейбір тасымалдаушылар жол қозғалысы ережелерін өрескел бұзып, жолда жүру мәдениетін елемей, қоғамдық тәртіпті бұзады. Мұның соңы жол апатына, жолаушылар мен басқа да жол қозғалысына қатысушылардың денсаулығына, тіпті өміріне зиян келтіруі мүмкін.
«Тасымалдаушы» жедел-профилактикалық іс-шарасы барысында Шымкент қаласы Полиция департаментінің Жергілікті полиция қызметі басқармасының қызметкерлері, патрульдік полиция роталары мен әкімшілік полиция бөлімшелерінің мамандары қаланың негізгі көшелері мен адам көп шоғырланатын жерлерде рейдтік жұмыстар жүргізуде.
Рейд барысында:
-
Заңсыз такси қызметін көрсететін көліктер анықталады;
-
Көліктердің техникалық жағдайы тексеріледі;
-
Жүргізушінің жүргізуші куәлігі, рұқсат құжаттары мен сақтандыру полисі сұралады;
-
Жолаушыларды қауіпсіз тасымалдау талаптарының орындалуы назарға алынады;
-
Жол қозғалысы ережесін бұзған жүргізушілерге қатысты ҚР Әкімшілік құқық бұзушылық туралы кодексіне сәйкес шаралар қолданылады.
Мысалы, егер тұлға жолаушы тасымалымен заңсыз айналысып жатса, оған ҚР ӘҚБтК-нің 463-бабы («Кәсіпкерлік қызметпен рұқсатсыз айналысу») бойынша әкімшілік хаттама толтырылады. Сонымен қатар, мұндай көліктер айып тұрағына қойылады.
Шара аясында тек заң бұзушыларды анықтау ғана емес, жолаушылардың қауіпсіздігін қамтамасыз ету де маңызды орын алады. Полиция қызметкерлері жол қозғалысы ережелерін сақтау, жүргізушілердің жауапкершілігін арттыру, азаматтардың қауіпсіз тасымалға деген көзқарасын өзгерту бағытында түсіндіру жұмыстарын да қатар жүргізіп отыр.
Қоғамдық көлік жүргізушілеріне арнап жадынамалар таратылып, қауіпсіздік белдігін тағу, жылдамдықты асырмау, жолаушыны рұқсат етілген жерлерден ғана отырғызу және түсіру сынды маңызды талаптар тағы да еске салынуда.
Шымкент қаласының тұрғындары бұл шараны оң қабылдап отыр. Себебі соңғы уақытта қалада жол апаттарының көпшілігі жүргізушілердің салғырттығынан және ережені елемеуінен туындауда. Әсіресе, таңғы және кешкі қарбалас уақытта заңсыз такси қызметін ұсынатын көліктер жол үстінде тәртіпсіздікке себепкер болып келеді.
— Біз күн сайын таксимен жүреміз. Бірақ кім отырғызды, көлігі техникалық тұрғыдан жарамды ма – бұл жағын көп ойламаймыз. Енді полиция осындай шаралар арқылы заңсыз тасымалдаушыларды анықтап жатқаны қуантады. Бұл – біздің де қауіпсіздігіміз үшін, – дейді қала тұрғыны Айгүл Жақыпова.
«Тасымалдаушы» жедел-профилактикалық іс-шарасы – жол қауіпсіздігін арттыру, қоғамдық тәртіпті нығайту және жолаушылар тасымалы саласын тәртіпке келтіру жолындағы маңызды қадам. Шара нәтижесінде полиция қызметкерлері жол қозғалысына қатысушылар арасында тәртіп пен заңға бағынудың маңызын түсіндіру арқылы құқық бұзушылықтардың алдын алуға күш салуда.
Шымкент қаласының Полиция департаменті тұрғындарды жолда қауіпсіздік мәдениетін сақтауға және тек заңды тасымалдау қызметін пайдалануға шақырады. Себебі әр азаматтың қауіпсіздігі – бәрінен қымбат.
Пікір қалдыру