Шымкент қаласында ағымдағы жылдың 1–14 тамызы аралығында «Таза Қала» атты ауқымды профилактикалық іс-шара өткізілуде. Іс-шараның негізгі мақсаты – қала аумағында санитарлық тазалық пен қоғамдық тәртіпті қамтамасыз ету, тұрғындардың құқықтық және экологиялық мәдениетін арттыру, сондай-ақ тыныштықты бұзуға жол бермеу.
Бұл бастама – тек коммуналдық сала қызметкерлерінің ғана емес, тұтас қоғамның ортақ жауапкершілігін талап ететін маңызды шара. Қала көшелерінің тазалығы, қоғамдық орындардың жай-күйі, көпқабатты үйлердің ауласы, көшелердегі тәртіп пен тыныштық – барлығы тұрғындардың белсенділігі мен тәртіпке деген көзқарасына тікелей байланысты.
Шымкент қаласы Полиция департаментінің Еңбекші аудандық полиция басқармасының қызметкерлері «Таза Қала» акциясы аясында күшейтілген режимде жұмыс жүргізуде. Патрульдік топтар мен учаскелік инспекторлар көшелерді, қоғамдық орындарды, базар маңдарын, аулаларды аралап, тұрғындар мен кәсіпкерлік субъектілерінің тазалық сақтау және тыныштық бұзбау бойынша заң талаптарын орындауын тексерді.
Рейдтік іс-шаралар нәтижесінде бірқатар азаматтар мен кәсіп иелері санитарлық тазалық ережелерін өрескел бұзғаны үшін ҚР Әкімшілік құқық бұзушылық туралы кодекстің 505-бабы («Қалалар мен елдi мекендердiң аумақтарын абаттандыру қағидаларын бұзу») бойынша әкімшілік жауапкершілікке тартылды. Сондай-ақ, қоғамдық орындарда дауыс көтеріп, тыныштықты бұзған, түнгі уақытта тұрғындардың мазасын алған тұлғаларға қатысты да ҚР ӘҚБтК-нің 437-бабы («Тыныштықты бұзу») аясында шаралар қабылданды.
Қаланың санитарлық жағдайы – тек эстетикалық көрсеткіш емес, ол тұрғындардың денсаулығына, қала имиджіне, экологиялық ахуалға тікелей әсер етеді. Қала көшелерінде қоқыс тастау, тұрмыстық қалдықтарды арнайы орындарға жеткізбей тастау, көше саудасы кезіндегі ластану – күнделікті кездесетін өзекті мәселелер. Бұл әрекеттердің алдын алу үшін құқық қорғау органдары түсіндіру жұмыстарымен қатар, заң шеңберінде тиісті шаралар қолдануға мәжбүр.
Тәртіп сақшылары тазалық мәдениетін қалыптастыру тек жазалау шараларымен шектелмейтінін айтады. Бұл бағытта тұрғындармен профилактикалық әңгімелесулер, түсіндіру жұмыстары, жадынамалар тарату секілді жұмыстар белсенді түрде жүргізілуде.
Атап өту керек, іс-шара барысында тек жеке тұрғындар ғана емес, кәсіпкерлік нысандары, дүкен иелері, қоғамдық тамақтану орындары, базар сатушылары да тексерілді. Көп жағдайда осындай нысандардың маңында тұрмыстық қалдықтарды рұқсат етілмеген орындарға тастау, контейнерлердің жетіспеушілігі немесе бейберекет қоқыс жинау фактілері тіркеледі.
Полиция басқармасы мұндай заңбұзушылықтарға төзімділік танытпай, әр факті бойынша әкімшілік іс қозғап, айыппұлдар салып отыр. Сонымен қатар, кәсіпкерлерге санитарлық талаптарды сақтау бойынша ескерту беріліп, мерзімінде орындалмаған жағдайда қатаң шаралар қолданылатыны ескертілді.
«Таза қала – өз қолымызда» қағидасын ұстанған тәртіп сақшылары қала тұрғындарын тазалық пен қоғамдық тәртіпке бейжай қарамауға шақырады. Әсіресе, көпқабатты үй аулалары мен балалар алаңқайларының маңын таза ұстау – тұрғындардың тікелей міндеті. Бұл – тек коммуналдық қызметке артып қойылатын жұмыс емес, әр азаматтың санасынан бастау алатын мәдениет.
Еңбекші аудандық полиция басқармасының қызметкерлері алдағы уақытта да бұл бағыттағы жұмыстарды тұрақты түрде жалғастырмақ. Себебі қоғамдық тыныштық пен санитарлық тазалық – жай ғана ережелер жиынтығы емес, ол өмір сапасының негізгі көрсеткіші.
«Таза Қала» іс-шарасы қала тұрғындарына өз ортақ үйіміз – Шымкенттің тазалығы мен тыныштығы үшін әркімнің үлесі маңызды екенін тағы бір еске салды. Полиция қызметкерлері осындай іс-шаралар арқылы тұрғындардың құқықтық сауаттылығын арттырып, тәртіп пен тазалықты қатар ұстануға үндейді.
Пікір қалдыру