Жаңа оқу жылының қарсаңында Шымкент қаласында балаларға арналған маңызды әрі игі шара – «Мектепке жол» акциясы өткізілді. Бұл қайырымдылық бастама қалалық Қазақстан халқы Ассамблеясы мен «Respublica» партиясының Шымкент қаласындағы әйелдер қанатының облыстық филиалының бірлескен ұйымдастыруымен жүзеге асты. Іс-шараға түрлі сала өкілдері, қоғам белсенділері, ата-аналар мен балалар қатысты.
Жылы жүрек пен шынайы қамқорлықты ұштастырған акция Шымкенттегі Достық үйінде өтті. Кештің шымылдығын аниматорлар ашып, балаларға көтеріңкі көңіл-күй мен жарқын әсер сыйлады. Түрлі ойындар мен би бағдарламасы арқылы бүлдіршіндерге мерекелік атмосфера қалыптасты. Іс-шараны жүргізуші салтанатты түрде ашып, барлық қатысушыларға ізгі тілектерін арнады. Көпшіліктің жүрегін елжіреткен бұл жиын нағыз қамқорлық пен ізгіліктің үлгісіне айналды.
Шара аясында 70-тен астам әлеуметтік жағынан аз қамтылған отбасыдан шыққан оқушыға жаңа оқу жылына қажетті құрал-жабдықтар, атап айтқанда мектеп сөмкелері, дәптерлер, қаламдар, түрлі кеңсе тауарлары мен оқу жабдықтары табысталды. Әрбір бала өзіне қажетті заттарды алып, алдағы оқу жылына сеніммен қадам басуға мүмкіндік алды.
Қайырымдылық акциясына қатысқан «Respublica» партиясының Шымкент қаласындағы әйелдер қанатының облыстық филиалының төрайымы Нилуфар Сайдуллаева, Қазақстан халқы Ассамблеясы жанындағы қалалық Аналар кеңесінің төрайымы Гүлжан Сүгірбаева, сондай-ақ партия мүшелері мен қоғам белсенділері өз тілектерін білдіріп, бұл шараның маңыздылығын атап өтті.
— «Бала қуанса – әлем қуанады. Бүгінгі шара арқылы балаларға қамқорлық пен мейірім сыйлау – бәріміздің ортақ міндетіміз. Бұл – болашақ ұрпаққа жасалған инвестиция. Жаңа оқу жылы қарсаңында балаларды қолдау арқылы біз олардың білімге деген ынтасын арттырып, алға қойған армандарына қанат бітіреміз», – деді Аналар кеңесінің төрайымы Гүлжан Сүгірбаева.
Акция аясында әр бала тек материалдық көмекке ғана емес, үлкен рухани қолдауға да ие болды. Балалардың жарқын күлкісі мен қуанышты жүздері — бұл бастаманың ең үлкен нәтижесі. Олардың ата-аналары ұйымдастырушыларға шын жүректен алғыстарын айтып, мұндай шаралардың балалардың болашағына сенім ұялататынын жеткізді.
Іс-шара барысында қатысушылар балалардың білім алуына жағдай жасау – тек мемлекеттің ғана емес, бүкіл қоғамның ортақ міндеті екенін атап өтті. «Мектепке жол» акциясы – осы ұстанымның айқын көрінісі. Ұйымдастырушылардың айтуынша, бұл жоба алдағы жылдары да жалғасын тауып, ауқымы кеңейе түспек.
Шара соңында балаларға тәттілер мен кішкентай сыйлықтар үлестіріліп, оларға жаңа оқу жылында сәттілік пен биік белестер тіленді. Ата-аналар мен балалар үшін бұл тек көмек көрсету емес, үлкен үміт пен шабыттың бастамасы болды.
Мектепке қажетті заттармен қамтамасыз ету – материалдық тұрғыдан қолдау ғана емес, бұл олардың өздерін қоғамның бір бөлшегі ретінде сезініп, үлкендер тарапынан көрсетілген жылылықты естен шығармауына ықпал етеді. Мұндай қамқорлық балалардың болашақта да мейірімді, жауапты азамат болып өсуіне оң әсерін тигізетіні сөзсіз.
«Мектепке жол» акциясы — балалардың болашағына салынған көпір. Бұл – бір сәттік шара емес, ұзақ мерзімді әлеуметтік жауапкершіліктің көрінісі. Шымкент қаласында өткен бұл игі бастама қоғамда мейірімділік пен жанашырлықтың әлі де болса биік құндылық екенін дәлелдеді.
Ұйымдастырушылар алдағы уақытта да осындай әлеуметтік маңызы бар жобаларды жалғастырып, балалардың білім алуына, тұлға ретінде қалыптасуына жан-жақты қолдау көрсетуді мақсат етіп отыр.
Пікір қалдыру