Елімізде қолға алынған «Кітап оқитын ұлт» республикалық жобасына Шымкент қаласы ресми түрде қосылды. Бұл туралы қала әкімі Ғабит Сыздықбеков өзінің Instagram парақшасында хабарлады. Жобаның мақсаты — кітап оқу мәдениетін дамыту, білім мен танымды дәріптеу және оқырман қауымды көбейту арқылы қоғамның рухани әлеуетін арттыру.
Игі бастама ҚР Парламенті Мәжілісінің төрағасы, «AMANAT» партиясының төрағасы Ерлан Қошановтың бастамасымен іске қосылып отыр. Жобаның пилоттық аймақтары ретінде Шымкент қаласы, Қарағанды және Қостанай облыстары таңдалып алынған. Бұл өңірлердегі алғашқы нәтижелер болашақта жобаның еліміз бойынша кеңінен таралуына негіз болмақ.
Мемлекет басшысы Қасым-Жомарт Тоқаев Ұлттық құрылтайдың соңғы отырысында: «Озық ойлы ұлт болудың ең төте жолы – кітап оқу» деген болатын. Президенттің бұл сөзі — бүгінгі күнгі рухани даму бағытының өзегі. «Кітап оқитын ұлт» жобасы осы үндеудің аясында қолға алынып, ел азаматтарының әдебиетке, ғылымға және жалпы мәдениетке деген қызығушылығын арттыруды көздейді.
Шымкент қаласының әкімі Ғабит Сыздықбеков бұл бастаманы зор ықыласпен қолдап, қала тұрғындарын белсенді қатысуға шақырды. Өз жазбасында әкім былай деді:
«Шымкент – тарихы терең, мәдениеті бай, білім саласының дәстүрі қалыптасқан қала. Сондықтан дәл осындай маңызы зор жобаның біздің шаһарда жүзеге асуы – заңдылық. Кітап – тұлғаны қалыптастырып, ойды өсіретін құндылық. Әрбір шымкенттікті осы игі іске атсалысуға шақырамын».
Жоба аясында түрлі санаттар бойынша байқаулар ұйымдастырылады. Әр қатысушы өз саласына қарай 15 кітап оқып, байқауға қатысуға мүмкіндік алады. Жеңімпаздарға арнайы марапаттар мен бағалы сыйлықтар табысталады.
Байқау келесі номинациялар бойынша өтеді:
-
«Кітап оқитын мектеп»
-
«Кітап оқитын колледж»
-
«Кітап оқитын университет»
-
«Кітап оқитын педагог»
-
«Кітап оқитын мемлекеттік қызметкер»
-
«Кітап оқитын әулет»
Әрбір номинация бойынша әділ қазылар алқасы қатысушылардың белсенділігі мен оқу сапасын саралап, үздіктерді анықтайды. Жобаның тағы бір ерекшелігі – кітаптарды тек оқып қана қоймай, олар жайлы рецензия жазу, пікір білдіру, пікірталас клубтарына қатысу сияқты шығармашылық тапсырмалар да қамтылған.
Жобаны жүзеге асырушылар:
«Кітап оқитын ұлт – Читающая нация» қоғамдық қоры мен «AMANAT» партиясы бұл жобаны бірлесіп ұйымдастырып отыр. Рухани серпіліске бағытталған бастаманың басты демеушісі – отандық ірі кәсіпорындардың бірі, ALAGEUM ELECTRIC компаниясы. Бұл – бизнестің әлеуметтік жауапкершілік аясында ел болашағына бағытталған маңызды инвестициясы деуге болады.
Шымкент қаласы әкімдігінің мәліметінше, байқау шарттары мен қатысу ережелері туралы толық ақпарат қала әкімдігінің ресми сайтында жарияланатын болады. Сонымен қатар, әлеуметтік желілерде, білім беру мекемелерінде және мәдени орталықтарда да кеңінен түсіндіру жұмыстары жүргізіледі.
«Кітап оқитын ұлт» – бұл тек байқау ғана емес, ел болашағы үшін жасалып жатқан стратегиялық бастама. Қазіргі цифрлық ғасырда адамдардың назары экранға ауа бастаған кезеңде кітапқа деген қызығушылықты ояту аса маңызды. Жоба арқылы жастар мен ересектердің бойында білімге деген құштарлық, сыни ойлау қабілеті мен мәдениетке деген құрмет артады.
Ата-аналар мен педагогтер тарапынан бұл бастамаға қолдау танытылып жатқаны қуантады. Көптеген мектептер мен колледждер өз оқырман клубтарын құрып, оқушылар мен студенттерге арнайы оқу жоспарларын жасауда. Бұл – білім беру процесін жаңа деңгейге көтеретін тың тәсіл.
Шымкент қаласының бұл жобаға қосылуы – ел ішіндегі үлкен мәдени серпілістің басы болмақ. Болашақта басқа өңірлер де осы бастаманы жалғастырып, кітап оқу – сәнге айналған игі дәстүрге ұласуы тиіс. Бұл тек білімді ұрпақ тәрбиелеу ғана емес, ұлттық бірегейлікті сақтау мен қоғамның ой-санасын жаңғырту жолындағы маңызды қадам.
Пікір қалдыру