2025 жылғы 8 қыркүйекте жарияланған Қазақстан Республикасының Президенті Қасым-Жомарт Тоқаевтың Жолдауында агроөнеркәсіп кешенінің (АӨК) жағдайын түбегейлі жақсартуға бағытталған бірқатар стратегиялық тапсырмалар айқындалды. Бұл тек саланы дамыту ғана емес, ауыл шаруашылығын жаңа деңгейге шығаратын жүйелі өзгерістер туралы сөз.
Президент Үкіметке контейнерлік тасымалдарды ынталандыру жөніндегі арнайы бағдарламаны қабылдауды тапсырды. Бұл құжатта мультимодальды бағыттарды дамытуға бағытталған нақты шаралар қамтылуы тиіс. Бұл қадам ішкі нарықты сапалы өніммен қамтамасыз етіп қана қоймай, елдің экспорттық әлеуетін де арттыруға мүмкіндік береді.
Мемлекет басшысы ауыл шаруашылығы өнімдерін контейнерлеу заманауи логистикалық шешім екенін атап өтті. Бұл тәсіл өнімнің сақталуын қамтамасыз етіп, шығындарды азайтуға және жаңа нарықтарға шығуға жол ашады.
Президент ауыл шаруашылығы жерлерін тиімді пайдалану мәселесіне де ерекше назар аударды. Ол спутниктік мониторинг жүйесін жетілдіру, сондай-ақ жасанды интеллект технологияларын енгізу қажеттігін атап өтті. Бұл шаралар жерді пайдалану үдерісін ашық әрі тиімді етеді, пайдаланылмай жатқан немесе заңсыз иеленіп отырған учаскелерді анықтап, тиісті шаралар қабылдауға жол ашады.
Мұндай технологиялар қазіргі таңда дамыған аграрлық мемлекеттерде кеңінен қолданылады және олар жер қорын оңтайландыруға, сондай-ақ өнімділікті арттыруға ықпал етеді.
Қасым-Жомарт Тоқаев азық-түлік нарығының импортқа тәуелділігін барынша азайту міндетін стратегиялық мақсат ретінде қойды. Бұл үшін отандық өндірісті қолдау, агробизнесті дамыту және инновациялық шешімдерді енгізу басты басымдықтар болып табылады.
Президенттің айтуынша, Қазақстан өзін негізгі азық-түлік өнімдерімен толық қамтамасыз етуге қабілетті елге айналуы керек. Бұл – елдің азық-түлік қауіпсіздігін қамтамасыз етудің басты кепілі.
АӨК-ті жаңғыртудың маңызды бағыты – агрохабтар мен логистикалық орталықтарды құру және жаңарту. Мемлекет басшысы мұндай инфрақұрылым ауыл шаруашылығы өнімдерін жинау, сақтау және тұтынушыға жеткізуде аса маңызды рөл атқаратынын атап өтті.
Агрохабтарда салқындатылған қоймалар, сұрыптау желілері, қаптау пункттері және сапаны бақылау зертханалары болуы тиіс. Бұл өнімнің сақталуын жақсартып, шығынды азайтып, ауыл шаруашылығы өнімдерінің қосымша құнын арттыруға септігін тигізеді.
2025 жылғы Жолдау агроөнеркәсіп кешенінің ел экономикасындағы басым рөлін айқын көрсетті. Президент ұсынған бастамалар өндіріс көлемін арттырумен қатар, инновацияны, тиімділікті, экологияны және экспортқа бейімделуді басты бағыт ретінде белгілейді.
Ауыл шаруашылығына қатысты қолға алынған шаралар АӨК-ті экономикалық өсімнің негізгі қозғаушы күшіне айналдыруы тиіс. Сонымен бірге, бұл ауылдық жерлерде мыңдаған жаңа жұмыс орындарын ашуға, инвестиция тартуға және елдің азық-түлік қауіпсіздігін қамтамасыз етуге мүмкіндік береді.
Пікір қалдыру