Қазақстан Республикасының Тәуелсіздік күні қарсаңында Түркістан қаласында тұрғындардың бастамасымен тағылымды әрі әсерлі мерекелік іс-шара жүзеге асты. Қаладағы 1-мөлтек ауданында орналасқан №3 көпқабатты тұрғын үйдің тұрғындары ортақ келісімге келіп, өз үйлерін мемлекеттік рәміздермен және Тәуелсіздік мерекесіне арналған безендіру элементтерімен әрледі.
Көпқабатты үйдің қасбеті көк Тумен көмкеріліп, ұлттық нақыштағы сәндік элементтермен толықты. Бұл бастама тұрғындардың елге, жерге деген сүйіспеншілігін, мемлекеттік рәміздерге деген құрметін және тәуелсіздік құндылықтарын қастерлейтін азаматтық ұстанымын айқын көрсетті. Үйдің мерекелік кейпі қала тұрғындары мен қонақтарының да көңілінен шығып, мерекелік атмосфераны одан әрі күшейте түсті.
Тұрғындардың айтуынша, аталған безендірудің басты мақсаты – жас ұрпаққа патриоттық тәрбие беру, мемлекеттік рәміздердің маңызын күнделікті өмірде насихаттау және Тәуелсіздік күнінің тарихи мәнін сезіндіру. Осындай ортақ іске бірігу арқылы тұрғындар өзара ынтымақтастық пен көршілік қарым-қатынастың үлгісін де көрсетті.
Бұл игі бастама Түркістан қаласында қалыптасқан азаматтық белсенділіктің жоғары деңгейін аңғартады. Қала тұрғындарының мерекелік көңіл күйі мен елдік рухты көтеруге бағытталған әрекеттері Тәуелсіздік күнінің мән-маңызын арттыра түсуде. Мемлекеттік мерекелерді осылайша бірлесіп атап өту – қоғамдағы бірлік пен татулықты нығайтудың жарқын көрінісі.
Тәуелсіздік – ата-бабамыз аңсаған қасиетті құндылық. Оны ұлықтау, құрметтеу және кейінгі ұрпаққа аманат ету әрбір қазақстандықтың парызы. Түркістандағы көпқабатты үй тұрғындарының бұл бастамасы сол жауапкершілікті терең сезінудің және отансүйгіштіктің айқын белгісі болды.
Пікір қалдыру