Түркістан қалалық сәулет бөлімінің басшысы Мұхит Көшеновтің төрағалығымен өткен ұжымдық мәжілісте қала басшысының хаттамалық тапсырмаларының орындалу деңгейі жан-жақты талқыланды. Мәжіліске қатысушылар шаһардағы заңсыз орналастырылған нысандар мен ретсіз ілінген жарнамалардың қазіргі ахуалын саралап, олардың келбетін жақсарту бойынша қабылданған шараларды нақтылады.
Жиналыс қорытындысы бойынша, қала аумағындағы ретсіз қойылған 9 нысан алынып тасталды. Сонымен қатар сыртқы сәулеттік келбеті талапқа сай келмейтін 14 кәсіпкерлік нысанның иелеріне ескерту беріліп, осының нәтижесінде 10 кәсіпкерлік нысанның қасбеттері ретке келтірілді. Қаланың сәулеттік бейнесін сақтау мақсатында белгіленбеген орындарға ілінген 596 жарнама демонтаждалып, 71 жарнама нысаны тиісті заң талаптарына сай келтіріліп, ресми түрде тіркеуге алынды.
Түркістан – барша түркі жұрты мен қазақ халқының рухани астанасы, тарихи маңызы тереңнен тамыр тартқан ежелгі қала. Орталық Азиядағы ең көне шаһарлардың бірі саналатын бұл мекенде 21 хан, 8 сұлтан, 23 би мен 59 батырдың мәңгілік тыныстап жатқаны ғылыми негізде дәлелденген. Облыс орталығы мәртебесін алғаннан бері Түркістан күннен-күнге абаттанып, ажарланып келеді. Тұтас қазақ тарихының куәсі іспетті көне қала бүгінгі таңда заманауи инфрақұрылыммен толығып, халықтың көз алдында гүлденіп, жаңа кейіпке енуде. Шетелден және еліміздің түкпір-түкпірінен келетін қонақтар мен туристер әр сапарында қаланың сәулеті көркейіп, жаңа ғимараттар бой көтеріп жатқанын байқайды.
Облыс орталығы мәртебесін иеленген төрт жылдың ішінде құрылыстың қарқыны тоқтаған емес. Зәулім тұрғын үйлер, әлеуметтік нысандар мен мәдени ошақтар шаһарға көрік беріп, оның жаңа тынысын аша түсті. Әрине, мұның бәрі оңайлықпен келген жетістік емес. Қала аумағында салынып жатқан нысандар облыс әкімдігі мен жергілікті биліктің қатаң бақылауында. Десе де, әрбір қол жеткізген табыстың артында қарапайым еңбек адамдарының маңдай тері мен табан ақысы жатқанын ұмытпаған жөн. Құрылыс алаңдарында күндіз-түні тынбай еңбек ететін жұмысшылар мен олардың ісін қадағалайтын сала басшыларының да еңбегін атап өткен жөн. Олар өз ісіне жауапкершілікпен қарап, қаланың сәулеттік келбетіне үлес қосып келеді.
Шаһар басшысының жетекшілігімен жүзеге асатын құрылыс-жөндеу жұмыстары қаланың әлеуметтік-экономикалық дамуын да қамтиды. Халық санының өсуі, тұрғындардың тұрмыс сапасын арттыру, инфрақұрылымды жетілдіру – мұның бәрі әкімдік пен жергілікті органдардың күнделікті назарында. Халықтың игілігі үшін қабылданып жатқан шешімдер мен атқарылып жатқан жұмыстар қаланың болашағы үшін аса маңызды. Келешекте Түркістан халқының саны көбейіп, қала әлеуетінің артуына байланысты жаңа әлеуметтік нысандар, демалыс орындары, мәдени орталықтар мен заманауи үлгідегі тұрғын үй кешендері салынатын болады.
Осылайша, Түркістан шаһары өзінің бай тарихи мұрасын сақтай отырып, заман талабына сай дамуда. Қалалық сәулет бөлімінің тиянақты жұмысы, мердігер компаниялардың жауапкершілігі, жергілікті биліктің талапшылдығы мен еңбек адамдарын бағалауы нәтижесінде Түркістан бүгінгіден де көрікті, қолайлы және тартымды орталыққа айналып келеді. Мұның барлығы тұрғындардың әл-ауқатын жақсартып, рухани астананың мәртебесін одан әрі асқақтата түспек.
Пікір қалдыру