ТҮРКІСТАНДА 20-ҒА ЖУЫҚ МЕМЛЕКЕТТІҢ ҚОЛӨНЕРШІЛЕРІ БАС ҚОСТЫ

Түркістанда Әлемнің халықаралық қолөнер қалалары ұйымы (WCC International) президенті

Саад әл-Қаддуми бастаған әлемге танымал қолөнершілер мен өнер сарапшылары бас қосты.

Айтулы мәдени шараға Австралия, АҚШ, Иран, Қытай, Малайзия, Шри-Ланка, Бангладеш, Өзбекстан, Қырғызстан, Тайланд сынды мемлекеттерден 30-ға тарта қолөнершілер келді. Қала әкімі Нұрбол Тұрашбековтің бастамасымен ұйымдастырылған бұл шараның мақсаты – киелі шаһарға Халықаралық қолөнершілер қаласы мәртебесін беру. Өңірдегі қолөнершілерді қолдау мақсатында облыс орталығында «Қолөнершілер қалашығы» туристік кешені салынуда. Аталған орталықтың ішінде арнайы көрме залы, шоурум бөлмелері саялы бақ, шығыс базары, мейрамханалар, қонақ үй, автотұрағы бар. Кешеннің жалпы алаңы – 2,56 га қамтиды. Құрылыс жұмыстарын жыл соңына дейін аяқтау жоспарлануда.

Қала қонақтары алдымен Оқушылар сарайына ат басын бұрып, жас қолөнершілерінің жұмысымен танысты. Шеберлер сондай-ақ, Қ.А Ясауи кесенесінде болып, тарихи жәдігерді аралады. Кесене құрылысының тарихына үңіліп, сәулетін тамашалады.

Қала әкімінің орынбасары Талғат Төлегенов қонақтарға Түркістанның туристік әлеуеті мен мүмкіндіктерін баяндап, көрсеткіштерімен таныстырды.

2023 жылы қолөнер саласындағы зерттеу жұмыстарын жүргізіп, жергілікті қолөнершілердің тәжірибелерімен алмасу мақсатында Түркістан қаласы әкімдігінің ұйымдастыруымен Бірлестік мүшелерінен құралған деллегация Өзбекстан Республикасының Самарқанд қаласы мен Ферғана облысына барды. Сонымен қатар, қала қолөнершілері Әзербайжан Республикасының Шуша қаласында Халықаралық ТЮРКСОЙ ұйымының ұйымдастыруымен өткен салтанатты шараға қатысып, «Хары-бюльбюль» халықаралық фольклорлық фестивалінде көпшілікке қазақтың ұлттық тағамдары мен қолөнер шеберлерінің ең үздік бұйымдарының көрме-жәрмеңкесі ұсынылды. Нәтижесінде қазақстандық делегация жоғары баға алып, түркі халқының ыстық ықыласына бөленіп келді.
Бұл іс-шараларға Қазақстанмен қатар, Өзбекстан, Тәжікстан, Қырғызстан, өзге де түркітілдес мемлекеттердің өкілдері қатысты.

2024 жыл — Қытайдағы Қазақстанның туризмі жылы. Осыған орай, Бейжің қаласында ауқымды іс-шаралар мен форумдар өтті. Оған Қолөнер одағының төрайымы мен шеберлер арнайы қатысты. Халықаралық көрмеге Қолөнер одағының шеберлері мен шәкірттерінің қолөнерлері көпшіліктің ыстық ықыласына бөленіп, қызығушылығын арттырды.

Әлемнің халқаралық қолөнер қалалары ұйымының (WCC International) президенті  Саад әл-Қаддуми түркістандық қолөнершілердің жұмысына таңданысын жасырмады. Саад мырза ұйымдастырушыларға алғысын білдіріп, Түркістанның өзіне тән ерекшелігі, қолөнершілердің қалыптасқан қолтаңбасы барын атап өтті.

Қала қонақтары рухани-мәдени орталықтағы туристік нысандарды аралап, өзгерістерге тәнті болды.