Қала әкімі Әзімбек Пазылбекұлының төрағалығымен көпқабатты тұрғын үйлердің сапасы бойынша жиын өтті. Бұл маңызды шарада құрылыс саласындағы ағымдағы жағдайлар талқыланып, болашақта орын алатын жұмыстардың жоспары анықталды.
Жиында құрылыс саласында атқарылып жатқан жұмыстар мен жедел саты бойынша қызмет көрсетуші мекемелердің жұмыстары, сондай-ақ, шешімін таппай келе жатқан мәселелер жан-жақты талқыланды. Әкімшілік өкілдері мен құрылыс саласының мамандары арасында пікір алмасу жүзеге асты, нәтижесінде жобалардың тиімді жүзеге асырылуына қажетті шешімдер қабылданды.
Жалпы Түркістан қаласы аз уақытта қанатын жайып, өркендеп келе жатқан қала болып табылады. Қаладағы құрылыстар қарқынды жүріп, тұрғын үйлер саны күннен күнге артып келеді. Бұл үрдіс тұрғындардың сапалы өмір сүру деңгейін көтеруге және инфрақұрылымның дамуына зор үлес қосуда. Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы аясында №11-ші көшенің бойындағы «Жібек жолы» тұрғын үй кешенінің құрылыс жұмыстары белсенді түрде жүргізіліп жатыр.
Тұрғын үй кешенінде жалпы 5 қабатты 24 үй тұрғызу жоспарланған. Биыл 5 қабатты 15 үйдің құрылысы аяқталып, 1314 пәтер кезекте тұрған азаматтарға пайдалануға беріледі деп жоспарланып отыр. Қалған 5 қабатты 9 үйдің құрылысы 2025 жылы аяқталуы күтілуде, онда 766 пәтер ұсынылуы жоспарланған. Бұл шара тұрғындардың тұрғын үй мәселесін шешуде үлкен рөл атқарады деп сенеді қала әкімдігі.
Аталған тұрғын үйлердің құрылыс жұмыстарының сапалы орындалуы облыстық құрылыс басқармасының мамандары тарапынан қатаң бақылауға алынған. Құрылыс стандарттарына сай жұмыстардың жүргізілуі және материалдардың сапасы қамтамасыз етілді. Мердігер мекемелер қатарында «Корпорация Бастау» ЖШС, «ЕвроРемонтСервис» ЖШС, «Жаңа арна құрылыс» ЖШС, «Symkent Build» ЖШС, «PANA QURYLYS GROUP» ЖШС, «ОТАР ҚҰРЫЛЫС» ЖШС, «Integra construction KZ» ЖШС сияқты беделді құрылыс компаниялары бар. Олар өздерінің тәжірибесі мен кәсібилігі арқылы жобалардың уақытында және сапалы аяқталуын қамтамасыз етеді. Ал авторлық қадағалаушы – «Mataibekov Architects» ЖШС болып табылады, ол архитектуралық шешімдердің үйлесімділігін және эстетикалық талаптарға сай болуын қадағалайды.
Айта кетейік, өңірде биыл жалпы 224 тұрғын үй (2 469 пәтер) құрылысы жүргізіліп жатыр. Олардың басым бөлігі – көпқабатты тұрғын үйлер, бұл қалада жоғары тығыздықты және үйлесімді өмір сүру ортасын қалыптастыруға мүмкіндік береді. Қала әкімдігі тұрғын үй саласындағы инвестицияларды тарту мақсатында түрлі жеңілдіктер мен ынталандыру шараларын іске асыруда. Сонымен қатар, инфрақұрылымдық жобалармен қатар, қоғамдық орындардың, мектептер мен денсаулық сақтау мекемелерінің құрылысына да ерекше көңіл бөлінуде.
Қала тұрғындарының қала құрылысына деген сенімі мен қолдауы жоғары деңгейде. Әзірге құрылысы жүріп жатқан жобалардың барлығы уақытында аяқталуы және сапалы болуы жоспарланып отыр. Бұл Түркістан қаласының болашақтағы дамуы мен өркендеуіне зор үлес қосады деп үміттенеді әкімшілік өкілдері. Қаладағы құрылыс саласының дамуы тұрғындардың тұрмыс деңгейін көтеріп, экономиканың жалпы көрсеткіштерін жақсартуға бағытталған маңызды қадам болып табылады.
Қала әкімдігі мен құрылыс саласының мамандарының тығыз ынтымақтастығы нәтижесінде, Түркістан қаласы заманауи талаптарға сай, ыңғайлы және қауіпсіз тұрғын үйлермен қамтамасыз етіледі. Бұл шаралар қаланың әлеуметтік-экономикалық дамуына оң ықпалын тигізіп, тұрғындардың сапалы өмір сүруіне жағдай жасайды. Әзімбек Пазылбекұлының жетекшілігімен атқарылып жатқан жұмыстардың нәтижесі ретінде қала тұрғындары жаңа үйлерде жайлы және қауіпсіз өмір сүре алады деп сенеді.
Пікір қалдыру