Тазалық — мәдениеттіліктің айнасы. Қоғам дамуында бұл қарапайым қағида ешқашан өз өзектілігін жоғалтқан емес. Қоршаған ортаға жанашырлықпен қарау, оның тазалығын сақтау — бүгінгі және келешек ұрпақ үшін маңызды міндет. Таза аула, ұқыпты көше, жасыл желекке оранған саябақтар мен гүлзарлар — мұның бәрі тұрғындардың өмір сүру сапасын жақсартып қана қоймай, рухани байлығын, мәдени деңгейін де айқындайды. Осы орайда ел аумағында жүргізіліп жатқан «Таза Қазақстан» жобасы — экологиялық сананы арттыруға, қоршаған ортаны қорғауға және табиғатқа ұқыпты қарауға шақыратын бірегей бастама.
Жуырда өткен жалпы қалалық сенбілік — «Таза Қазақстан» жобасының мақсат-міндеттерін жүзеге асыру жолындағы нақты қадамдардың бірі болды. Сенбілікке қала әкімі Әзімбек Пазылбекұлы бастаған мемлекеттік қызметкерлер, ардагерлер қауымы, мәслихат депутаттары, облыстық басқармалар мен департаменттердің өкілдері, түрлі ұйым белсенділері, коммуналдық сала қызметкерлері, тұрғындар, кәсіпкерлік нысан иелері және белсенді жастар қатысты. Бұл ауқымды шара қаланың тазалығы мен абаттандырылуына ғана емес, сонымен қатар қоғамның бірлескен әрекетінің күшін тағы бір рет дәлелдеді.
Әр сенбі сайын дәстүрге айналған сенбіліктердің бұл жолғысы да жоғары деңгейде өтті. Бекітілген кестеге сай барлық қатысушылар өздерінің жұмыс орындарының айналасын, шағынаудандардағы көпқабатты тұрғын үй аулаларын, қоқыс жәшіктері мен балалар ойын алаңдарын, ирригациялық арық жүйелерін қоқыстан тазартып, көшеттер отырғызды. Қаланың сырт аймақтарында да ретке келтіру жұмыстары жүргізіліп, кәсіпкерлік нысандарының заңсыз жарнамалары алынып, ағаш түптері әктелді. Бұл — қаланың инфрақұрылымын жақсартуға, тұрғындардың өмір сүру ортасын салауатты етуге бағытталған маңызды қадам.
Сенбілік барысында мыңнан астам адам жұмылып, 28 арнайы техника тартылды. Ұжымдық еңбектің нәтижесінде 10 мың көшет отырғызылып, 280 тонна қоқыс шығарылды. Бұл көрсеткіш — жалпы қалалық сенбіліктің жүйелі ұйымдастырылуы мен оған қатысушылардың белсенділігінің айқын айғағы. Ел алдында тұрған маңызды міндет — қаланы таза ұстап қана қоймай, осы мәдениетті ұрпақтан-ұрпаққа жалғастыру, экологиялық ағартушылықты жетілдіру.
«Таза Қазақстан» жобасы мемлекетіміздің дамуына, оның экологиялық жағдайын тұрақтандыруға, табиғи ресурстарды сақтауға бағытталған. Бұл бастама тұрғындарды тек қоқыс шығаруға емес, оны азайтуға, қалдықтарды қайта өңдеп, кәдеге жаратуға, су мен энергияны үнемдеуге, айналадағы ортаға құрметпен қарауға үндейді. Табиғаттың байлығын, қоршаған ортаның сұлулығын сақтау — кез келген азаматтың борышы. Тек сол кезде еліміздегі қалалар мен ауылдар таза, жайлы, адам өмір сүруге қолайлы ортаға айналады.
Мәдениет саласының қызметкерлері осы тазалық шараларына белсенді түрде қатыса отырып, қоғамға үлгі болуда. Өнер, әдебиет және білім саласының өкілдері тазалықты тек сыртқы ортаға ғана емес, ішкі мәдениетке де тән қасиет ретінде дәріптеп келеді. Мәдениет — халықтың рухани байлығының қайнар көзі. Демек, тазалық тек денсаулықтың ғана кепілі емес, сонымен бірге рухани тәрбиенің, адамгершілік құндылықтардың қалыптасуына жол ашатын маңызды фактор. Мәдениет саласындағылар тұрғындардың бойына тазалыққа деген сүйіспеншілікті өнер туындылары, шығармашылық жобалар, ағартушылық шаралар арқылы дарытады. Олар тазалық идеясын қоғамға жеткізіп қана қоймай, оның орындалуына тікелей қатысып, үлгі көрсетеді.
Елімізде қолға алынған «Таза Қазақстан» жобасы — бұл көпжылдық стратегиялық бастама. Ол азаматтық қоғам өкілдерін, бизнес құрылымдарын, мемлекеттік органдарды, білім беру мекемелерін, мәдениет үйірмелерін және барлық ниетті азаматтарды бір мүддеге тоғыстырады. Ортақ ниет — таза, жасыл және гүлденген Қазақстанды қалыптастыру. Ал бұл мақсатқа жету үшін әрбір адам, әрбір шаңырақ, әрбір ұжым күнделікті тіршілігінде тазалық пен ұқыптылыққа мән беруі қажет.
Алдағы уақытта қала әкімдігі мен жергілікті билік органдары тазалық жұмыстарына қатысты шараларды жүйелі түрде жалғастырмақ. Ағаш отырғызу, гүлзарлар егу, суару, арықтарды тазарту, қоқыс жинау сияқты шаралар тұрақты жүргізіліп, тұрғындардың белсенді қатысуына жол ашылмақ. Сонымен қатар, қайта өңдеу технологияларын енгізу, қалдықтарды сұрыптау мәдениетін қалыптастыру, энергияны үнемдеу, экологиялық білім беру жұмыстары да жалғасатын болады.
Қорыта айтқанда, тазалық — ортақ игілік, қоғамның мәдени келбетінің ажырамас бөлігі. «Таза Қазақстан» жобасы осы құндылықтарды бекемдеп, ортамызды жақсартуға, табиғатты аялап, келер ұрпаққа мұра етуге бағытталған маңызды қадам. Бұл бастаманы іске асыруда әрбіріміздің үлесіміз бар. Сенбіліктер арқылы тұрғындар бір-біріне көмектесіп, қоғамды жақсартып, мәдениеттіліктің биік шыңына қадам басады. Тазалық — жердің бетінде де, адам көңілінде де ұлық қасиет. Тек таза ортада ғана мәдениет гүлденіп, қоғам өркендейді.
Пікір қалдыру