2025 жылы Түркістан облысы әлеуметтік-экономикалық дамудың жаңа кезеңіне қадам басып отыр. Бұл тұрғыда өңір әкімдігі ауыл шаруашылығы саласына ерекше мән беруде. Облыс әкімінің орынбасары Нұрбол Тұрашбековтің төрағалығымен өткен мәжілісте аудан, қала әкімдіктері мен басқарма басшыларының қатысуымен индикаторлық жоспардың орындалу барысы мен ауыл шаруашылығына қатысты өзекті мәселелер талқыланды.
Жиында Нұрбол Тұрашбеков Ұлттық ауыл шаруашылығы санағына өңірлердің дайындығын пысықтап, жетекшілік ететін салалар бойынша берілген тапсырмалардың орындалуын саралады. Бұл санақ — еліміздің агроөнеркәсіп кешеніндегі ресурстар мен өндіріс көлемін нақтылап, стратегиялық шешімдер қабылдауға мүмкіндік беретін маңызды статистикалық база. Осыған байланысты облыс аумағындағы барлық аудандар мен қалаларда дайындық жұмыстары қарқынды жүруі тиіс.
Мәжілісте басқарма басшылары әр аудан мен қаладағы кенжелеп тұрған бағыттарды атап өтті. Су үнемдеу технологиясын ендіру жұмысының баяу жүріп жатқаны Түлкібас, Бәйдібек, Келес аудандары мен Кентау қаласына ескертілді. Бұл мәселе тек экологиялық емес, экономикалық маңызға да ие. Өйткені суды тиімді пайдалану — өнімділік пен шығын көлемін тікелей әсер ететін фактор. Жергілікті жерлерде бұл технологиялардың енгізілуі шаруалардың шығындарын азайтып, ауыл шаруашылығының рентабельділігін арттырады.
Сонымен қатар, мәжілісте инвестиция тарту, қарқынды бау-бақша шаруашылығы, жылыжайлар саласын дамыту және ауыл шаруашылығы техникаларын жаңарту сынды өзекті мәселелер қаралды. Нұрбол Тұрашбеков аудандар арасындағы тәжірибе алмасу тәжірибесін күшейтуді тапсырды. Бұл тәсіл аграрлық сектордың бәсекеге қабілеттілігін арттырып, заманауи технологиялар мен тәсілдерді кеңінен қолдануға жол ашады.
– Кедергілер болса, бірге талқылап, шешу жолын қарастырайық. Жыл басында белгіленген межемен бәріңіз келістіңіздер, ендігі айтқан уәждеріңіз қабылданбайды. Мәселе бөлімдегі мамандарға жүктегенмен шешілмейді. Жауапкершілік өздеріңізден талап етіледі. Сондықтан, кабинеттен шығып, шаруашылықтарды аралаңыздар. Қалыптасқан жағдайды өздеріңіз сараптағанда ғана нақты шешім, ұтымды ұсыныс айта аласыздар, – деді әкімнің орынбасары.
Экономика тұрғысынан қарағанда, ауыл шаруашылығы саласының дамуы — Түркістан облысы үшін басты табыс көздерінің бірі. Облыстың ішкі жалпы өніміндегі аграрлық сектордың үлесі едәуір жоғары. Осы бағытты қолдау арқылы жұмыссыздық деңгейін төмендетуге, ауыл тұрғындарының табысын арттыруға және азық-түлік қауіпсіздігін қамтамасыз етуге болады. Сонымен қатар, жылыжай шаруашылығы мен қарқынды бау-бақша арқылы экспорттық әлеуетті арттыру да маңызды экономикалық бағыттардың бірі саналады.
Мәселен, соңғы жылдары Түркістан облысында жылыжай алаңдарының көлемі жыл сайын өсіп келеді. Бұл өз кезегінде ішкі нарықты көкөніс өнімдерімен қамтамасыз етіп қана қоймай, көрші елдерге экспортқа шығару мүмкіндігін арттырады. Ауыл шаруашылығы техникаларын жаңарту да – өнім көлемі мен сапасын арттыратын, шығынды азайтатын маңызды қадам. Бұл ретте үкімет тарапынан берілетін субсидиялар мен жеңілдетілген несиелердің тиімділігі жоғары болуы қажет.
Ұлттық ауыл шаруашылығы санағы нәтижесінде алынатын мәліметтер өңірлік аграрлық саясатты нақты жоспарлауға, қаржыландыру тетіктерін тиімді ұйымдастыруға және ауыл шаруашылығы кооперативтерін қолдауға жол ашады. Мәліметтерге сүйене отырып, облыс әкімдігі ауыл шаруашылығы өндірісін әртараптандыру, жер және су ресурстарын тиімді пайдалану, агроөнеркәсіптік кешеннің бәсекеге қабілеттілігін арттыру бойынша нақты шешімдер қабылдай алады.
Қорытындылай келе, Түркістан облысында ауыл шаруашылығына бағытталған кешенді шаралар — өңір экономикасының тірек салаларының бірі ретінде айқындалып отыр. Аудан, қала әкімдіктерінің белсенділігі, басқарма басшыларының үйлесімді жұмысы және шаруалардың қолдауы арқылы бұл салада айтарлықтай серпіліс жасауға толық мүмкіндік бар.
Пікір қалдыру