Шымкент қаласының орталықтандырылған көпшілік кітапханалар жүйесіне қарасты №2 кітапхана бөлімшесінде қазақ вальсінің королі атанған әйгілі композитор Шәмші Қалдаяқовтың өмірі мен шығармашылығына арналған әдеби-әуенді кеш ұйымдастырылды. Рухани-танымдық бағыттағы іс-шараның мақсаты – сазгердің мәдени мұрасын кеңінен насихаттап, жас ұрпаққа ұлттың өнер қайраткерлері туралы терең мағлұмат беру.
Кешке қала зиялылары, оқырмандар және түрлі этномәдени бірлестіктердің өкілдері қатысты. Атап айтқанда, Славян этномәдени бірлестігінің мүшелері, композитордың туған қарындасы Райхан Қалдаяқова, сондай-ақ Қазақстан Қарулы күштерінің ардагері, полковник С.Мещанов кештің құрметті қонағы болды. Полковник С.Мещанов өз сөзінде Шәмші Қалдаяқовтың шығармаларының отансүйгіштік рухты оятудағы маңыздылығына тоқталып, ұлт мәдениетін ұлықтаудың қажеттілігін ерекше атап өтті.
Шара барысында композитордың өмір жолы мен шығармашылығын қамтитын тақырыптық кітап көрмесі ұйымдастырылып, көрмеде сирек кездесетін фотоматериалдар мен басылымдар, естеліктер көпшілік назарына ұсынылды.
Сондай-ақ, «Светоч» хорының өнерпаздары Шәмші Қалдаяқовтың кеңінен танымал әндерін орындап, кешке әсерлі атмосфера сыйлады. Кешке жиналған көпшілік композитордың музыкасына деген зор ықыластарын білдіріп, оның ұлт руханиятындағы орнының ерекше екенін атап өтті.
Пікір қалдыру