Шымкент қаласында құрылыс саласы соңғы жылдары ерекше қарқынмен дамып келеді. Қаланың аумағы кеңейіп, жаңа тұрғын үйлер, әлеуметтік нысандар мен инфрақұрылымдар бой көтеруде. Мұндай даму қарқыны құрылыс процестерінің сапасы мен заңдылығына қойылатын талаптарды да арттыра түсетіні сөзсіз. Осыған орай Шымкент қаласының қалалық орта сапасы және бақылау басқармасы тарапынан құрылыс-монтаждау жұмыстарының заң талаптарына сәйкес жүргізілуін қамтамасыз ету бағытында ауқымды шаралар қолға алынған.
2025 жылдың қаңтар-сәуір айлары аралығында басқармаға құрылыс-монтаждау жұмыстарының басталатыны жөнінде барлығы 489 ресми хабарлама келіп түсті. Бұл хабарламалар арнайы реестрге тіркеліп, заң талаптарына сай рәсімделген. Оның ішінде 41 нысан – мемлекеттік, яғни бюджеттік қаржы есебінен салынатын құрылыс нысандары болса, қалған 448 нысан жеке қаражат есебінен жүргізіліп жатқан жобаларға тиесілі.
Құрылыс процестерін бақылау барысында түрлі заңбұзушылықтар да анықталып жатады. Ағымдағы жылдың алғашқы төрт айында 61 құрылыс нысаны бойынша заң талаптарына сай келмейтін әрекеттер тіркеліп, 142 әкімшілік құқық бұзушылық туралы хаттама толтырылған. Нәтижесінде, бұл нысандарға қатысты жауапты тұлғалар әкімшілік жауапкершілікке тартылды. Мұндай нақты әрі қатаң бақылау — құрылыс сапасын қамтамасыз етудің басты тетігі болып отыр.
Басқарманың қызмет бағыты тек құрылысқа бақылаумен шектелмейді. Сонымен қатар лицензиялау және аттестаттау салаларында да жұмыс белсенді жүргізілуде. 2025 жылдың алғашқы төрт айында құрылыс саласында сарапшылық және инжинирингтік қызмет көрсету құқығын алу үшін барлығы 61 сарапшыға аттестат берілген. Бұл — мамандардың біліктілігін арттыру және саланың сапалы дамуына жағдай жасау үшін маңызды қадам.
Бұған қосымша, басқарма қала аумағындағы лифтілердің техникалық жағдайын бақылау және оларды жаңарту бағытында да жұмыстарды үйлестіріп отыр. Қазіргі таңда Шымкент қаласында барлығы 1249 лифт тіркелген. Оның 950-і тұрғын үйлерде, 59-ы денсаулық сақтау мекемелерінде, 56-сы білім беру ұйымдарында орналасқан. Сонымен қатар, қоғамдық орындарда, сауда орталықтарында және қонақ үйлерде тағы 184 лифт жұмыс істеп тұр.
Лифт жүйелерін жаңарту және техникалық жағдайын жақсарту мәселесі ҚР Үкіметінің 2022 жылғы 23 қыркүйектегі №736 қаулысымен бекітілген «Тұрғын үй-коммуналдық инфрақұрылымды дамытудың 2023–2029 жылдарға арналған тұжырымдамасы» аясында жүзеге асырылып жатыр. Осы тұжырымдама негізінде 2025 жылы жергілікті бюджеттен қайтарымды қаржы есебінен 28 лифтіні ауыстыру жоспарланған болатын. Бүгінгі таңда оның 24-і толықтай жаңартылып, пайдалануға берілді, ал қалған 4 лифт бойынша жұмыстар әлі жалғасуда.
Алдағы жылдарға арналған нақты жоспар да бар. 2025 жылы қалада тағы 12 лифтіні ауыстыру, ал 2026 жылы 23 лифтіні жаңарту көзделіп отыр. Бұл жұмыстар тұрғындардың қауіпсіздігі мен жайлы өмір сүруін қамтамасыз ету үшін аса маңызды.
Жалпы алғанда, Шымкент қаласында құрылыс саласын жүйелі бақылау, техникалық қауіпсіздік және инфрақұрылымды дамыту бағытындағы жұмыстар нақты жоспарлар мен заңнамаға сәйкес атқарылып келеді. Қаланың өсуі мен өркендеуі осы саладағы тәртіп пен сапаға тікелей байланысты.
Пікір қалдыру