Мемлекет басшысы жариялаған «Жұмысшылар жылы» аясында елімізде еңбек адамының мәртебесін көтеру, олардың әлеуметтік жағдайына назар аудару және еңбек ұжымдарының маңызын арттыру бағытында түрлі іс-шаралар ұйымдастырылуда. Осы мақсатта Шымкент қалалық Қазақстан халқы Ассамблеясының мүшелері мен этномәдени бірлестіктердің төрағаларынан құралған делегация «KazFerroGroup» жауапкершілігі шектеулі серіктестігінде іссапармен болды.
Бұл кездесудің басты мақсаты – өндірісте еңбек етіп жүрген жұмысшылардың тыныс-тіршілігімен танысу, олардың жұмыс жағдайын көру, әлеуметтік қолдау тетіктерін зерделеу және еңбек ұжымдарының ұсыныс-пікірлерін тыңдау арқылы нақты мәселелерге назар аудару.
Делегация мүшелері кәсіпорын аумағын аралап, өндірістік үдерістердің барысымен, заманауи технологиялармен жабдықталған жаңа цехтардың жұмысымен танысты. Сондай-ақ кәсіпорын тарапынан қызметкерлерге көрсетіліп жатқан әлеуметтік қолдау шаралары туралы жан-жақты ақпарат алды. Компания басшылығы өз баяндамасында кәсіпорынның құрылу тарихы мен даму жолына шолу жасап, соңғы жылдары жүзеге асырылып жатқан жобалар мен бастамалар туралы егжей-тегжейлі айтып берді.
Атап айтқанда, жұмысшылардың еңбекақысын кезең-кезеңімен арттыру, баспана мәселесін шешу мақсатында тұрғын үймен қамту тетіктері, медициналық қызмет сапасын жақсарту және еңбек қауіпсіздігін сақтау бағытында жүргізіліп жатқан жұмыстар тілге тиек етілді. Бұдан бөлек, кәсіби кадрларды даярлау және қайта даярлау мақсатында ұйымдастырылған оқыту бағдарламалары жайлы да айтылды. Бұл бастамалар қызметкерлердің әл-ауқатын жақсартып қана қоймай, өндіріс орнында кадр тұрақтылығын сақтауға, еңбек өнімділігін арттыруға айтарлықтай әсер етіп отыр.
Кездесу барысында Ассамблея мүшелері мен этномәдени бірлестіктер басшылары жұмысшылармен еркін форматта әңгімелесіп, олардың ұсыныс-пікірлерін тыңдады. Еңбеккерлер өз тарапынан жалақыны көтеру, жұмыс жағдайын жақсарту, кәсіби өсуді қамтамасыз ету сынды мәселелерге қатысты ойларын білдіріп, оң өзгерістерге ризашылықтарын жеткізді.
Іс-шара соңында Шымкент қалалық Қазақстан халқы Ассамблеясының атынан өндірісте үздік нәтиже көрсеткен бірқатар қызметкерлерге Алғыс хаттар табысталды. Бұл — жұмысшылардың еңбегін бағалап, олардың кәсіби жетістіктеріне құрмет көрсетудің нақты көрінісі.
Ассамблея өкілдері аталған бастаманың маңыздылығын атап өтіп, алдағы уақытта да еңбек адамының қоғамдағы орнын көтеруге бағытталған жұмыстар жалғасатынын жеткізді. Мұндай іс-шаралар тек өндірістік үрдісті жандандырып қана қоймай, қоғамдағы этносаралық келісімді нығайтуға, еңбек адамының абыройын асқақтатуға ықпал ететіні анық.
Осылайша, «Жұмысшылар жылы» аясында өткен бұл іссапар еңбек ұжымдары мен билік өкілдерінің арасындағы ашық диалог алаңына айналып, әлеуметтік әріптестікті дамыту жолындағы маңызды қадам болды.
Пікір қалдыру