2025 жылғы 3 қыркүйекте Шымкент қаласындағы №45 мектеп-гимназиясында 8-сынып оқушыларымен маңызды профилактикалық кездесу өтті. Іс-шараға І аусымның директордың тәрбие ісі жөніндегі орынбасары Г.А. Конгирбаева, Шымкент қаласы Полиция департаменті Әл-Фараби ауданы Полиция басқармасының Ювеналды полиция бөлімшесінің инспекторлары – полиция майоры Н. Рахимов пен полиция капитаны С.Ш. Палжанов арнайы қатысты.
Бұл кездесудің басты мақсаты – жаңа 2025–2026 оқу жылында кәмелетке толмағандар арасындағы құқықбұзушылықтың алдын алу, жасөспірімдердің құқықтық сауаттылығын арттыру және мектеп оқушылары арасында қауіпсіздік мәдениетін қалыптастыру болды.
Іс-шара барысында оқушыларға кәмелетке толмағандар жасауы мүмкін құқықбұзушылық түрлері мен олардың салдары туралы жан-жақты түсіндірме жұмыстары жүргізілді. Атап айтқанда, полиция қызметкерлері түнгі уақытта заңды өкілсіз көшеде жүрудің жауапкершілігі, мектептен тыс уақытта бос жүрістің қауіптілігі және зиянды әдеттердің (темекі, электронды сигарет, ішімдік, т.б.) жасөспірім психикасына кері әсері туралы нақты мысалдар келтіре отырып баяндады.
Жасөспірімдер үшін кейде өз әрекетінің заңдық салдарын түсіну қиынға соғады. Сондықтан мұндай кездесулер олардың санасына жауапкершілік сезімін сіңіріп, қандай да бір теріс әрекеттің арты неге апаратынын алдын ала ұғындыру үшін өте маңызды.
Кездесудің ерекше бөлігінде полиция капитаны С.Ш. Палжанов қазіргі жастар ортасында кең таралған буллинг пен кибербуллинг туралы кең көлемде ақпарат берді. Әлеуметтік желілердегі қудалау, достар арасындағы психологиялық қысым және оның бала психикасына әсері – бүгінгі күннің өзекті мәселесіне айналып отыр. Сонымен қатар, лудомания – яғни, жасөспірімдер арасындағы құмар ойындарға әуестік те назардан тыс қалмады.
Бұлар тек құқықтық емес, сонымен қатар психологиялық мәселе екені де айтылды. Сондықтан мұғалімдер мен ата-аналардың бірлесе жұмыс істеу қажеттігі ерекше атап өтілді.
Іс-шара соңында «Ашық микрофон» ұйымдастырылып, оқушылар көкейде жүрген сұрақтарын тікелей полиция қызметкерлеріне қоюға мүмкіндік алды. Бұл бөлікте оқушылар белсенділік танытып, шынайы қызығушылықтарын көрсетті. Жасөспірімдер өз құқықтары мен міндеттері, төтенше жағдайларда не істеу керек, бейтаныс адамдармен қалай қарым-қатынас жасау керек сияқты түрлі сұрақтар қойып, нақты әрі түсінікті жауаптар алды.
Полиция қызметкерлері тек құқық бұзушыларды жазалайтын мекеме өкілдері ғана емес. Олар – қоғамдағы тәртіп пен тұрақтылықтың негізгі кепілі. Әсіресе, ювеналды полиция бөлімшелері жасөспірімдермен тығыз жұмыс істеп, олардың өмірлік бағытын дұрыс қалыптастыруға бағытталған түрлі шараларды тұрақты өткізіп келеді.
Мұндай профилактикалық кездесулер – жасөспірімдер мен полиция арасындағы сенім көпірін орнатуға ықпал етеді. Бұл – бала тәрбиесінде аса маңызды фактор. Себебі полиция қызметкерлері — заңды сақтаудың үлгісі бола отырып, жастарды қылмыстан, теріс әрекеттерден аулақ болуға шақырады.
№45 мектеп-гимназиясында өткен кездесу – құқықбұзушылықтың алдын алуға бағытталған тиімді профилактикалық шаралардың бірі болды. Қатысушылар құқықтық білімдерін кеңейтіп, өз қауіпсіздігі үшін қандай әрекеттер жасау керектігін түсінді. Мұндай кездесулер оқушылардың өмірге деген жауапкершілік көзқарасын қалыптастырып, оларды саналы азамат етіп тәрбиелеуге үлкен септігін тигізеді.
Жас ұрпақтың болашағы – олардың бүгінгі тәрбиесі мен алған білімінде. Сондықтан тәртіп пен заңдылықты сақтауға баулу – тек мектеп пен ата-ананың ғана емес, құқық қорғау органдарының да ортақ міндеті.
Пікір қалдыру