Түркістанда Мемлекеттік рәміздер күніне арналған салтанатты шара ұйымдастырылып, елдіктің басты нышаны – Қазақстан Республикасының Мемлекеттік Туы көтерілді.
Мерекелік жиынға облыс басшылығы, ардагерлер, қоғамдық ұйым өкілдері, жастар, спортшылар мен қала тұрғындары қатысты. Рәсім барысында көпшілік Мемлекеттік Әнұранды орындап, Тәуелсіз Қазақстанның басты құндылықтарына құрмет көрсетті.
Іс-шарада сөз алған облыс әкімі Нұралхан Көшеров Мемлекеттік рәміздердің ел тарихындағы орны мен маңызын атап өтті. Оның айтуынша, Ту, Елтаңба және Әнұран – тәуелсіздіктің айқын белгісі әрі ұлттың рухани тұтастығын танытатын құндылықтар.
Мерекелік бағдарлама патриоттық әндер мен мәдени шараларға ұласып, қатысушыларға ерекше әсер сыйлады.
Өңірде мемлекеттік рәміздерді дәріптеу бағытындағы жұмыстар жүйелі түрде жалғасып келеді. Биыл бірқатар аудандарда арнайы Рәміздер алаңдары ашылып, тұрғындардың игілігіне берілді. Бұл бастамалар жас ұрпақтың отансүйгіштік рухын нығайтуға және ұлттық құндылықтарды кеңінен насихаттауға бағытталған.
