Сайрам ауданында тұрғындардың көптен бергі тілегі жүзеге аспақ. Жақын уақытта ауданда алғашқы заманауи ойын-сауық кешенінің құрылысы басталады. Бұл жоба ауданның мәдени және демалыс инфрақұрылымын жаңа деңгейге көтеруге бағытталған.
Соңғы жылдары жергілікті тұрғындар тарапынан кинотеатр ашу мәселесі жиі көтеріліп келген еді. Халықтың сұранысын ескере отырып, аудан басшылығы инвесторлармен бірлесіп, ауқымды жобаны іске асыруға кірісті.
Жобаның жалпы инвестициялық құны 2,5 миллиард теңгені құрайды. Төрт қабатты кешенде заманауи кинотеатрдан бөлек, балалардың ойын аймақтары, қоғамдық тамақтану орындары мен сауда нүктелері орналасады. Осылайша жаңа нысан әртүрлі жастағы тұрғындардың бос уақытын тиімді өткізуіне мүмкіндік береді.
Кешен Әйтеке би ауылындағы Халыққа қызмет көрсету орталығы маңынан салынады деп жоспарлануда. Жоба жүзеге асқан жағдайда аудан тұрғындары сапалы демалыс қызметтерін өз өңірінде пайдаланып қана қоймай, ондаған жаңа жұмыс орны ашылады.
Бұл бастама Сайрам ауданының әлеуметтік инфрақұрылымын дамытуға серпін беріп, өңірдің инвестициялық тартымдылығын арттыруға да ықпал етпек.
