Түркістан қаласында туристерге ұсынылатын сервистің сапасын арттыруға бағытталған кезекті ұйымдастыру шарасы өтті. Қаладағы негізгі туристік нысандарда келушілерге қызмет көрсететін электрокар жүргізушілері үшін арнайы түсіндіру кездесуі ұйымдастырылып, онда қауіпсіздік талаптары мен қызмет көрсету мәдениетіне қатысты маңызды мәселелер қаралды.
Мәдени-рухани орталық аумағында өткен жиынға учаскелік және туристік полиция қызметкерлері, сондай-ақ Кірістер басқармасының мамандары қатысты. Мамандар электрокар жүргізушілеріне қолданыстағы талаптар мен қызмет көрсету стандарттарын егжей-тегжейлі түсіндірді.
Кездесу барысында жүргізушілердің 18 жасқа толуы және тиісті санаттағы жүргізуші куәлігінің болуы, гид-экскурсовод сертификатын иеленуі, белгіленген бірыңғай киім үлгісін сақтауы және туристерге қызмет көрсету мәдениетін арттыру мәселелері кеңінен талқыланды. Сонымен қатар көлік ішінде музыкалық сүйемелдеу тәртібін сақтау қажеттігі ескертілді.
Бұдан бөлек, электрокарлардың қозғалыс бағытына өзгерістер енгізіліп, енді олар жаңа маршруттық сызбаға сәйкес «Қолөнершілер орталығы» аумағы арқылы да қатынайтын болады.
Түркістан қаласының туристік тартымдылығын арттыру және қызмет көрсету сапасын жақсарту мақсатындағы мұндай түсіндіру және бақылау шаралары алдағы уақытта да тұрақты түрде жалғасады.
