Ордабасы аудандық полиция бөлімінің ұйымдастыруымен «Нашақорлық пен синтетикалық есірткіге жол жоқ!» атты кең ауқымды профилактикалық бір айлық іс-шаралар легі бастау алды. Бұл бастаманың негізгі мақсаты – жастарды есірткі мен психобелсенді заттардың зиянынан сақтау, салауатты өмір салтын насихаттау, сондай-ақ қоғамның есірткіге қарсы иммунитетін күшейту.
Бастапқы шара аудандық мәдениет үйінде ұйымдастырылып, оған полиция қызметкерлері, ұстаздар, медицина саласының мамандары, спортшылар және белсенді жастар қатысты. Аудандық полиция бөлімі бастығының міндетін атқарушы Руслан Мейрбеков жиынды ашып, нашақорлықтың бүгінгі қоғамға тигізіп жатқан ауыр зардаптарына тоқталып өтті. Ол өз сөзінде есірткіге қарсы күрес — бір ғана полицияның емес, тұтас қоғамның ортақ міндеті екенін атап өтті.
Шара аясында есірткі тақырыбындағы бейнероликтер көрсетіліп, мектеп оқушылары мен жастарға түсінікті әрі әсерлі тілмен ақпарат берілді. Өнерпаздар нашақорлықтың зияны мен отбасыға, қоғамға тигізер залалын сахналық қойылым арқылы бейнелеп, патриоттық әндер шырқалды. Бұл — жастардың жүрегіне жол тауып, теріс әрекеттерден аулақ болуға жетелейтін тың тәсіл.
Сонымен қатар, медициналық мамандар есірткі тұтынудың денсаулыққа, жүйке жүйесіне және адам психикасына қалай әсер ететінін түсіндіріп, кеңес беру қызметтерін ұсынды. Ақпараттық парақшалар мен жадынамалар таратылып, жасөспірімдер мен ата-аналарға нақты ескертулер жасалды.
Нашақорлық — тек жеке адамның емес, бүкіл елдің әлеуметтік және экономикалық қауіпсіздігіне төнетін қауіп. Бұл дерттің артында қылмыс, адам өлімі, отбасылық күйреу мен ұрпақтың азуы секілді қайғылы салдарлар жатыр. Қазіргі таңда синтетикалық есірткілердің қолжетімділігі мен жасырын таралу жолдары бұл мәселені одан әрі күрделендіре түсуде.
Осы орайда, полиция қызметкерлері күнделікті тексеру, алдын алу, рейдтік жұмыстармен қатар, ағарту және түсіндіру жұмыстарын жүйелі жүргізіп келеді. Олар мектептер мен колледждерде лекциялар оқып, жастармен ашық диалог орнатуға күш салуда. Бұл — жас буынды есірткіге қарсы тәрбиелеудің ең тиімді жолы.
Полиция тек тәртіп сақшысы емес, қоғамның денсаулығы үшін күресуші де бола білуі керек. Ордабасы аудандық полиция бөлімінің қолға алған бұл бір айлық шарасы – сол бағыттағы нақты қадам. Шара барысында полицейлер барлық тұрғындарды есірткіге қарсы күресте бейжай қарамай, бірге әрекет етуге шақырды.
Жастар – ел болашағы. Олардың өмірі мен болашағын улауға жол бермеу – баршамыздың міндетіміз. Нашақорлықпен күрес – бүгінгі ұрпақты, ертеңгі мемлекетті сақтау жолындағы аса маңызды міндет.
Пікір қалдыру