Грекия елінің Корфу қаласында 10-14 қазан күндері ересектер арасында гір тасын көтеру спортынан әлем чемпионаты өтті. Жаһандық додада Түркістан облысының саңлақтары 2 алтын, 2 күміс және 4 қола медаль қанжығалады.
Жұлқи көтеру әдісінде 63 келіде ел намысын қорғаған Бағжан Байдуллаев өзінің мықтылығын көрсетіп, алтын медаль алды. Ал 78 келіде Ерасыл Қуаныш қола жүлдені қанағат тұтты. Сондай-ақ, серпе көтеру әдісінде 73 келіде күш сынаған Қобыланды Орынбасаров пен 95 келіде өнер көрсеткен Бақдаулет Шынтанов қола жүлдегерлер қатарынан көрінді. Тартысқа толы әлем біріншілігінде эстафеталық сында Қобыланды Орынбасаров пен Нұрбатыр Тұрғанбай күміске қол созды. Осындай аламанда ұзын циклда Ерасыл Қуаныш 78 келіде бақ сынап, қарсылас шақ келтірмесе, осы сында Қобыланды Орынбасаров қола медальді місе тұтты.
Пікір қалдыру