2025 жылдың ІІ тоқсанына арналған жұмыс жоспарына сәйкес, Шардара ауданының әкімі Арман Қарсыбаевтың төрағалығымен аудан әкімдігінің кезекті мәжілісі өтті. Мәжілісте білім беру және кәсіпкерлік салаларындағы өзекті мәселелер мен даму бағыттары қаралды. Жиынның басты назарында – аудан экономикасының маңызды бағыты саналатын кәсіпкерлік саласын дамыту мәселелері тұрды.
Кәсіпкерлік – бүгінгі таңда тек жеке табыс көзі емес, ауданның әлеуметтік-экономикалық дамуының тірегі. Бұл салада атқарылып жатқан жұмыстар туралы аудандық кәсіпкерлік бөлімінің басшысы Өмірбек Рүстем кеңінен баяндады. Ол өз есебінде ауданда шағын және орта бизнесті дамыту, жаңа жұмыс орындарын ашу, инвестициялық жобаларды қолдау және мемлекеттік бағдарламалар арқылы кәсіпкерлерге көрсетіліп жатқан көмектерге тоқталды.
Бүгінде Шардара ауданында ауыл шаруашылығы, сауда, қызмет көрсету және туризм бағытындағы кәсіпкерлік нысандары белсенді дамып келеді. «Бизнестің жол картасы – 2025», «Ауыл аманаты», «Жайлы мектеп» секілді мемлекеттік бағдарламалар аясында аудан кәсіпкерлеріне төмен пайызды несиелер, өтеусіз гранттар мен инфрақұрылымдық қолдау түрлері ұсынылуда. Бұл – жаңа бастама көтеріп жатқан жас кәсіпкерлер мен ісін кеңейткісі келетін бизнес өкілдері үшін үлкен мүмкіндік.
Сонымен қатар, мәжіліс барысында кәсіпкерлер тарапынан жиі көтерілетін өзекті мәселелер – жер телімдерін рәсімдеу, инфрақұрылымға қосылу, құжаттандыру және әкімшілік кедергілерді азайту жайы да талқыланды. Бұл бағытта әкімдік тарапынан жүйелі жұмыс жүргізілуде. Атап айтқанда, кәсіпкерлерге «бір терезе» қағидаты бойынша жедел қызмет көрсету, онлайн кеңес беру және бизнес идеяларды сүйемелдеу жүйесі енгізілуде.
Жиында кәсіпкерлікпен қатар, білім беру саласындағы жұмыстар да қаралды. Аудандық білім бөлімінің басшысы Жанат Мусатаева мектептердегі жағдай, жаңа оқу жылына дайындық және педагогикалық кадрлармен қамту мәселелері бойынша есеп берді. Бұл – болашақ мамандар мен кәсіпкерлерді даярлаудың негізі болмақ.
Мәжіліс барысында қатысушылар баяндамашыларға сұрақтар қойып, пікір алмасып, нақты ұсыныстарын жеткізді. Аудан әкімі Арман Қарсыбаев жиынды қорытындылай келе, кәсіпкерлік саласының дамуына ерекше мән берілетінін атап өтіп, жауапты бөлімдерге нақты тапсырмалар жүктеді. Әкім барлық бастамалар мен қолдау шараларының нәтижесі – аудан тұрғындарының әл-ауқатын арттыру екенін еске салды. Ол бизнес өкілдерімен тұрақты кері байланыс орнатып, әкімдік тарапынан көрсетілетін қолдаудың тиімділігін күшейтуді тапсырды.
Шардарада кәсіпкерлік саласын дамытудың келешегі зор. Бұл бағыттағы жүйелі жұмыстар – жаңа жұмыс орындарының ашылуына, аудан экономикасының нығаюына, ең бастысы, халықтың табысы мен тұрмыс сапасының артуына жол ашады. Ал әкімдік пен кәсіпкерлер арасындағы ашық әрі нәтижелі диалог – осы мақсатқа апарар сенімді жол.
Пікір қалдыру