Жыл сайын 14 маусымда атап өтілетін Дүниежүзілік донор күні – адам өміріне бей-жай қарамайтын, қан тапсыру арқылы өзге біреудің тағдырына үміт сыйлайтын жандарға алғыс білдіретін маңызды күн. Осы орайда Түркістан облысы Полиция департаментінің қызметкерлері жылдағы дәстүрге сай игі іске үн қосып, Түркістан қаласындағы Қан орталығының филиалына барып, ерікті түрде қан тапсырды.
Акцияға 50-ден астам полиция қызметкері қатысты. Олар бұл әрекетті өздерінің азаматтық әрі адами борышы деп санайды. Қан – адамның өмірін сақтап қалуға тікелей ықпал ететін теңдессіз ресурс. Сол себепті тәртіп сақшылары бұл шараға жай қатысушы емес, өмір үшін күресте жанашырлықпен қолдау көрсетуші ретінде келді.
Полицейлер тек құқық бұзушылықтың алдын алып, қоғамдық тәртіп пен қауіпсіздікті қамтамасыз етіп қана қоймай, мұқтаж жандарға дер кезінде медициналық тұрғыдан да көмек көрсете алатынын дәлелдеп келеді. Олар апат орын алған кезде тек алғашқы болып жетіп, оқиға орнын қоршап немесе тергеу жүргізіп қана қоймай, қажет болса алғашқы медициналық көмек көрсетіп, жедел жәрдем келгенше жарақат алғандарға жанұшыра қол ұшын береді. Бұл – олардың қызметтік міндетінен бөлек, адам өміріне деген жанашырлық пен шынайы қамқорлықтың көрінісі.
«Біз – полиция қызметкерлері ретінде күн сайын түрлі оқиғаларға куә боламыз. Жол-көлік оқиғаларында, өндірістік жарақаттар кезінде немесе күрделі операцияларда қанның қаншалықты маңызды екенін жақсы түсінеміз. Сондықтан мұндай акцияларға қатысу – біздің міндетіміз ғана емес, жан дүниеміздің үндеуі», – деді донор ретінде қан тапсырған тәртіп сақшыларының бірі.
Қан орталығының медицина қызметкерлері өз кезегінде акцияға белсене атсалысқан полицейлерге алғыстарын білдіріп, олардың бұл үлгісін көпке өнеге деп бағалады. Ақ халатты абзал жандардың айтуынша, мұндай донорлық акциялар науқастар үшін үлкен мүмкіндік пен үміт сыйлайды.
«Сіздердің тапсырған әр тамшы қандарыңыз – бір адамның өмірін сақтап қалуы мүмкін. Түркістан полицейлері жыл сайынғы бұл игі дәстүрді үзбей жалғастырып келеді. Бұл – үлкен құрметке лайық азаматтық іс», – деді қан орталығы өкілдері.
Донор болу – тек медициналық көмек көрсету емес, бұл – үлкен жүректің, биік парасаттың, қоғамдық жауапкершіліктің белгісі. Түркістан облысының тәртіп сақшылары бұл қасиеттердің барлығын өз бойларынан таба отырып, қоғам үшін тек қорғаушы емес, қамқоршы рөлін де қатар алып жүргенін көрсетті.
Осылайша, полиция қызметкерлері қоғамдағы құқықтық тәртіп пен қауіпсіздікті қамтамасыз етумен қатар, адам өміріне араша болу жолында да өз үлестерін қосуда. Мұндай бастамалар олардың кәсіби ғана емес, рухани-адамгершілік бейнесін де айшықтап көрсетеді.
Қорытындылай келе, Түркістан облысы полицейлерінің бұл игі бастамасы – барша азаматтарға үлгі. Қан тапсыру арқылы адам өмірін сақтап қалуға болады. Ал бұл жолда ешқашан кешігуге болмайды. Себебі әр тамшы қан – бір үміт, бір өмір, бір тағдыр.
Пікір қалдыру