Қазақстан Республикасы Ішкі істер министрлігі Ұлттық ұланының 6506 әскери бөлімінің әскери қызметшілері тағы бір мәрте қырағылық пен кәсіби дайындықтарын іс жүзінде дәлелдеді. Шымкент қаласында тұрғын үй кешендерінің бірінде орын алған төтенше жағдай кезінде олар шұғыл әрекет етіп, тұрғындардың қауіпсіздігін қамтамасыз етуге атсалысты.
Қала көшелерінің бірінде әдеттегі патрульдеу қызметін атқарып жүрген әскери жасақ тұрғын үйлердің бірінен түтін шыққанын байқап, жағдайға дереу назар аударған. Әскери жасақ бастығы қатардағы жауынгер Шахан Серікпай бұл оқиға туралы патрульдік топтың жетекшісі қатардағы жауынгер Нұрғазы Қырықбайға дереу баяндаған. Командирден пәрмен алған соң, жасақ мүшелері Өмірзақ Жолдасбек пен Елнұр Бекмаханмен бірге оқиға орнына шұғыл жеткен.
Төтенше жағдайлар министрлігінің қызметкерлері өрт сөндіру жұмыстарын бастап кеткен сәтте, Ұлттық ұланның жауынгерлері олардың іс-әрекетіне жедел қосылып, тұрғын үйдің жоғары қабаттарында қалған азаматтарды эвакуациялауға көмектесті. Олар адамдарды қауіпсіз жерге шығарып, ешқандай жарақат алмауын және дүрбелең туындамауын қамтамасыз етті.
Сонымен қатар, әскери жасақ өкілдері жағдайды бақылауға алып, оқиға орнын қоршауға алды. Бұл — адамдардың көптеп жиналуын болдырмау және төтенше қызметтердің жұмысына кедергі келтірмеу мақсатында жасалды. Әскери қызметшілердің кәсіби әрі үйлесімді қимылының арқасында оқиға орнында тәртіп сақталып, барлық іс-шаралар жүйелі түрде жүргізілді.
Оқиға туралы пікір білдірген жасақ бастығы Шахан Серікпай бұл олардың тікелей міндеті екенін айтып өтті:
— Ұлттық ұланның әскери қызметшісі ретінде біз кез келген жағдайда шұғыл шешім қабылдап, көмек көрсетуге міндеттіміз. Біз түтінді көрген сәтте, еш ойланбастан әрекет еттік. Қас-қағым сәтте көп нәрсе шешіледі. Ең бастысы — адамдар аман, — деді ол.
Азаматтық қорғау қызметі мен әскери жасақ арасындағы өзара үйлесімділік пен бірлескен іс-қимылдың арқасында эвакуациялау жұмыстары сәтті өтті. Қуанышқа орай, оқиға барысында ешбір азамат зардап шеккен жоқ. Бұл — мемлекеттік құрылымдар арасындағы тиімді әріптестіктің нақты көрінісі.
Айта кету керек, Ұлттық ұлан қызметкерлері тек құқықтық тәртіпті сақтау мен қоғамдық қауіпсіздікті қамтамасыз етумен ғана шектелмейді. Олар төтенше жағдайлар кезінде де алғашқы көмек көрсетуде белсенділік танытып, ел тыныштығы жолында аянбай еңбек етуде. Мұндай оқиғалар олардың тек әскери қызметші ғана емес, сонымен бірге нағыз азаматтық борышын адал атқарып жүрген жандар екенін көрсетеді.
Осылайша, 6506 әскери бөлімінің жауынгерлері ел тыныштығы мен халық қауіпсіздігі жолында өздеріне жүктелген міндеттерді абыроймен орындап келеді. Олардың кәсіби шеберлігі мен батыл әрекеті — отансүйгіштік пен азаматтық жауапкершіліктің айқын үлгісі.
Пікір қалдыру