Түркістан қаласы – ұлт руханиятының алтын діңгегі ғана емес, сонымен қатар жас ұрпақтың отансүйгіштік рухы қалыптасып, мемлекеттік құндылықтарға деген құрметі айқын көрініс табатын киелі мекен. Бүгінде Түркістан жастары Қазақстан Республикасының Мемлекеттік рәміздеріне – Ту, Елтаңба және Әнұранға деген ерекше құрметімен, оларды қолдану мәдениетін сақтаумен және кеңінен насихаттаумен ерекшеленіп келеді.
Мемлекеттік рәміздер – ел тәуелсіздігінің, тұтастығы мен бірлігінің басты белгілері. Оларды қастерлеу – әрбір азаматтың, әсіресе жастардың азаматтық борышы. Түркістан қаласында бұл бағытта жүйелі жұмыстар жүргізіліп, білім беру ұйымдарында, мәдени және қоғамдық орындарда патриоттық тәрбиені күшейтуге арналған түрлі іс-шаралар тұрақты түрде ұйымдастырылып келеді. Жастар рәміздердің мән-мағынасына терең үңіліп, олардың тарихы мен мазмұнын құрметтеуді өмірлік ұстанымына айналдыруда.
Қазақстан Республикасының Тәуелсіздік күні қарсаңында Қожа Ахмет Ясауи кесенесінің алдында өткен патриоттық шара соның жарқын дәлелі болды. Қасиетті кесене алдында бір топ Түркістан жастары Мемлекеттік Туды көтеріп, елге, жерге деген шынайы сүйіспеншілігін көрсетті. Олар тәуелсіз елдің ұрпағы ретінде мемлекеттің рәміздерін қастерлеу арқылы өздерінің патриот екенін іс жүзінде дәлелдеді. Бұл көрініс – өткен тарихқа тағзым, бүгінгі бейбіт өмірге құрмет және болашаққа деген сенімнің белгісі.
Түркістан жастары үшін Мемлекеттік Ту – көк аспандай кең пейілді елдің символы, Елтаңба – ортақ шаңырақ астындағы бірліктің бейнесі, ал Әнұран – жүректерді біріктіретін рухани күш. Жастар қоғамдық іс-шараларда, спорттық жарыстарда, мәдени жобаларда рәміздерді талапқа сай қолдануға, олардың қадір-қасиетін төмендетпеуге ерекше мән береді. Бұл – олардың азаматтық жауапкершілігінің жоғары екенін көрсетеді.
Қасиетті Түркістан төрінде мемлекеттік рәміздерді ұлықтау арқылы жастар ұлттық сана мен патриоттық рухты нығайтып келеді. Мұндай игі бастамалар елге деген сүйіспеншілікті арттырып, тәуелсіз Қазақстанның болашағы – саналы, отаншыл ұрпақтың қолында екенін айқын аңғартады.
Пікір қалдыру