Қазақстанда тұңғыш рет Шәмші Қалдаяқов музейі ашылды. Композитордың кіндік қаны тамған Отырар жерінде ашылған музей Шәмшінің 90 жылдық мерейтойына арналып отыр. Түркістан облысының Отырар ауданында туып-өсіп, «қазақ вальсінің королі» атанған ұлы композитордың бүгін 15 тамыз туған күні. Қазақ руханияты үшін елеулі мерекеге облыс басшысы арнайы келіп, музеймен танысты.
«Бүгін айтулы мереке. Шәмші Қалдаяқовтың туғанына 90 жыл толып отыр. Алайда, осы облысқа келгелі Шәмшінің кіндік қаны тамған жерде Шәмшіге арналған музейдің жоқ екенін білдім. Тіпті біздің бүкіл республикада «Қазақ вальсінің короліне» арналған бірде-бір музей жоқ. Аз уақыт ішінде кеткен кемшіліктің орнын толтыру үшін тапсырма беріп, демеушілер есебінен Шәмші музейінің ашылуын қолға алдық. Шәмші музейі – Жидебайдағы Абай музейі секілді жас композиторлар мен жас әншілер тәу ететін зиярат орнына айналуы тиіс»,- деді Өмірзақ Шөкеев.
Музей Шәмшінің көзін көрген, оның өміріне қанық азаматтар естелігін есепке ала отырып салынған.
Музей ішінде Ұлы композитордың өзі қолданған бұйымдары, саз шығаруға сеп болған мандолинасы секілді құнды жәдігерлер бар. ҚР Ұлттық Музейі Шәмшінің жаңадан ашылған музейіне композитордың бас киімін әкеліп тарту етті.
«Шәмші мұрағатын күтіп-баптау үшін мекеме облыстық музейдің филиалы ретінде ашылып, арнайы штат санымен мамандары жұмыс істейтін болады. Келген туристер мен қонақтарға барлық жағдай жасалады. Өскелең ұрпаққа Шәмшіні насихаттау жұмыстары мұнымен тоқтап қалмайды. Ең алдымен облыс орталығындағы жаңа музыка мектебіне Шәмші Қалдаяқов есімі берілсе, музыка мектебінің алдында еңселі ескерткіші бой көтереді. Сондай-ақ, Түркістан қаласындағы көшелердің бірі сазгер есімімен аталады,»- деп мәлімдеді Түркістан облысы әкімінің баспасөз қызметі.
Пікір қалдыру