ТҮРКІСТАН: САУРАНДА ИНВЕСТОР ЕСЕБІНЕН ЗАМАНАУИ ЕМХАНА САЛЫНАТЫН БОЛДЫ

Түркістан облысында медициналық нысандар санын көбейту, тұрғындардың денсаулығын жақсарту бағытында жұмыстар жүруде. Аталған салаға жеке инвесторларды тарту да жолға қойылған.

Түркістан облысы әкімінің орынбасары Бейсенбай Тәжібаев «Viamedis» жауапкершілігі шектеулі серіктестіктің бас директоры Әсет Ахметовпен кездесіп, екіжақты әріптестік мәселесін талқылады. Қос тарап іскерлік байланысты дамытуға ниет білдіре отырып, өзара ынтымақтастық туралы меморандум жасасты.

– Мемлекет тарапынан өңірде денсаулық сақтау саласының инфрақұрылымын жақсарту жұмыстары жүріп жатыр. Бұл ретте жеке инвесторларды тартуға да мән берілуде. Бірлесе жұмыс істеуге дайынбыз. Қолдау көрсетіледі, – деді Бейсенбай Тәжібаев.

Осы келісімге сай инвестор тарапынан Сауран ауданында заманауи емхана салынбақ. Емхана толығымен медициналық құрал-жабдықтармен және КТ, МРТ аппараттарымен қамтамасыз етіледі. Сонымен бірге оңалту орталығын салу бойынша де келіссөз жүргізілді.

Сауран ауданында 101 981 тұрғын бар, оның ішінде Сауран аудандық емханасына тіркелген халық саны – 74 326, емханада күндізгі стационарда 171 төсек-орын қарастырылған. 31 денсаулық сақтау нысаны бар. Аудандық емхана ғимараты 2017 жылы салынған. Жалпы ауданы – 992 м2 құрайды, жобалық қуаттылығы – ауысымына 100 адам. Медициналық құрал-жабдықтармен жарақтандырылуы – 68,7%, тозуы – 65,7%.

Айта кетейік, Түркістан өңірінде «Ауылдық денсаулық сақтауды жаңғырту» ұлттық пилоттық жобасы аясында 49 медициналық санитарлық алғашқы көмек нысанының құрылысы басталды. Атап айтқанда 20 дәрігерлік амбулатория, 23 фельдшерлік-акушерлік пункт және 6 медициналық пункт салынуда.

Сауран ауданында медицина саласына ерекше көңіл бөлініп келеді. Сондай-ақ, бірнеше елдімекендерде емханалар, медпункттер салынады деп жоспарланып отыр.

Аудан бойынша 1 — аудандық емхана, 2 — бастапқы медициналық көмек көрсету орталығы, 13 — дәрігерлік емхана (ВА), 13 — фельдшерлік–акушерлік бекет, 4 — медициналық бекеттер, 1 – арнайы мамандар бөлімі, 1 – жылжымалы медициналық кешен және 4 — жедел жәрдем бригадасы жұмыс жасайды. Сонымен қатар 172 төсек орынға арналған күндізгі стационар қызмет көрсетуде.

Аудандық емхана, арнайы мамандар, атап айтқанда пульмонолог, инфекционист, дерматовенеролог, иммунолог, балалар кардиологы, балалар хирургі, травматолог, реабилитолог, онколог, сарапшы дәрігер, гастроэнтеролог  мамандарымен  және УДЗ  3 дәрігерлерімен толықтырылды.

Аудан орталығы Шорнақ елді мекенінен тәулігіне 500 адам қабылдайтын емхана ғимаратының құрылысына 8,9 га жер бөлініп, жобалау-сметалық құжаттары рәсімделуде. 2023 жылға бекітілген жоспар бойынша типтік үлгіде жаңа ғимарат салыну жоспарланып, құжаттары рәсімделуде, Атап айтқанда: Шаға, Қызылжол, Ойық, Жалаңтөс, Құсшы ата елді мекендерінде.