Түркістан облысының әкімі Дархан Сатыбалдының тапсырмасына орай облыстағы маңызы бар жолдар жөндеуден өтуде. Өңір басшысы Отырар ауданына жұмыс сапарымен барып, бірқатар әлеуметтік маңызы бар нысанды аралады. Облыстық маңызы бар КХ-190 «Түркістан-Шәуілдір» автомобиль жолын қайта құру құрылысымен танысып, ондағы жүргізіліп жатқан жұмыстарды бақылады.
Құрылыс басында мердігер мекемелердің басшыларымен кездескен Дархан Сатыбалды бұл жолдың құрылысын уақтылы аяқтаудың, сапасына аса мән берудің маңыздылығын айтып, кемшіліктер бойынша тапсырмалар жүктеді.
Түркістан облысының жолаушылар көлігі және автомобиль жолдары басқармасының тапсырысымен жүгізіліп жатқан құрылыс жұмыстарын «АлемТрансЖол» ЖШС және «Отау-строй» ЖШС атқаруда. «Түркістан-Шәуілдір» жолын қайта құру жобасы 4 кезеңмен жүзеге асады. Жолдың ұзындығы 60 шақырымнан асады. 2022 жылдың қыркүйек айында басталған құрылыс жұмыстарын 2025 жылдың шілде айында аяқтау жоспарлануда.
Түркістан қаласы облыс орталығы болғалы бері облысқа келетін күре жолдардың барлығы жөндеуден өткізіліп жатыр. Соңғы жылдары Түркістан облысында елдімекендер мен ауданаралық жолдарды қалпына келтіру, тас төсеп, асфальттау, тозығы жеткен немесе жаңадан салынған көшелерде тұрғындарға ыңғайлы жағдай жасау мақсатында ауқымды жұмыстар атқарылып жатыр.
Пікір қалдыру