Түркістан қаласында кіші футболдан «Әуесқой Футбол Лигасының» (ӘФЛ) 2024 жылғы күз-қыс маусымы жоғары деңгейде ұйымдастырылып, өңірдің спорттық өміріне жаңа серпін берді. Бұл шара Түркістан облысының құрылғанына 6 жыл толуына орай өткізілгені де оның маңызын арттыра түсті. Жергілікті әкімдік пен спорт бөлімінің қолдауымен өткен лигаға жалпы 78 команда қатысты. Олар А, Б, С, Д топтары, «35+ Лига» және «Супер Лига» санаттарында бақ сынап, көрермендерге әсерлі матчтар сыйлады.
Екі айдан аса уақытқа созылған дода барысында алаңдағы тартыс та, командалардың ынта-жігері де жоғары деңгейде байқалды. Жергілікті жанкүйерлер де сүйікті командаларын қолдап, спорт алаңдарының көркін қыздырып отырды. Бұл лига тек жарыс қана емес, сондай-ақ спортшылар арасында тәжірибе алмасу, достық қатынастарды нығайту алаңы болды.1-орын: «Daily Food»
2-орын: «Marka kz»
3-орын: «Jamagat»
Үздік қақпашы: Акимжанов Фархад («Daily Food»)
Үздік қорғаушы: Қарашбаев Самат («Jamagat»)
Үздік сұрмерген: Төлебек Мардан («Daily Food»)
Үздік ойыншы: Бименов Уалихан («Marka kz»)
Ардагер ойыншылар додаға түскен «35+ Лига» санатында тәжірибенің маңызы айрықша байқалды. Бұл топта жасыл алаңға талай жылын арнаған футбол әуесқойлары біліктілігі мен шеберлігін тағы бір рет дәлелдеді. «Daily Food» командасының айқын жеңісі – жүйелі дайындық пен берік ұжымдық рухтың нәтижесі.
1-орын: «Yassi Gorod»
2-орын: «Bauyrlar»
3-орын: «AIDYN Energy»
Үздік қақпашы: Бикенов Фаррух («YASSI GOROD»)
Үздік қорғаушы: Әділ Пазылхан («AIDYN ENERGY»)
Үздік сұрмергендер: Вадим Афанасенко («Bauyrlar»), Сабиржанов Хасан («Marka kz»)
Үздік ойыншы: Парманов Нұрзат («YASSI GOROD»)
«Супер Лига» матчтарында шиеленіс пен жоғары қарқын анық сезілді. Жоғарғы деңгейдегі командалар өздерінің бар мүмкіндігін салып, жанкүйерлерін тәнті етті. «Yassi Gorod» командасының жеңісі мұқият дайындық пен ұжымдық тәртіптің жемісі болды. Команда ойыншыларының жанкештілігі, қорғаныс пен шабуылдағы шеберлігі – жас ойыншыларға өнеге болатындай үлгі.
Марапаттау рәсіміне Түркістан қаласы әкімдігінің мәдениет, тілдерді дамыту, дене шынықтыру және спорт бөлімінің басшысы Мұсағалиев Қадырболат Қабдырұлы және қалалық мәслихат депутаты Худияров Ғалымжан Батырханұлы қатысты. Олар жеңімпаздарды құттықтап, лиганың жергілікті спорт инфрақұрылымын дамытуға қосқан үлесін атап өтті. Мұндай шаралар арқылы қала жастары салауатты өмір салтын ұстануға ұмтылып, футбол мәдениеті кеңінен тарайды.
Бүгінде ӘФЛ – тек бір өңірлік турнир ғана емес, еліміздің көптеген қалаларында ұйымдастырылатын ірі әуесқой лигалардың бірі. Оның басты мақсаты – футбол сүйер қауымға тұрақты түрде ойын тәжірибесін ұсынып, жаппай спортпен шұғылдануға жігерлендіру. Лига әкімшілігі қатысушылар мен жанкүйерлердің ыңғайлылығын арттыру үшін электронды тіркеу жүйесін енгізіп, онлайн статистика жүргізуде. Командалардың нәтижелері, ойыншылардың голдары мен пас саны, үздік ойыншылар рейтингі – барлығы ашық әрі қолжетімді.
Сонымен қатар, ӘФЛ өз инфрақұрылымын жетілдіру мақсатында жаңа алаңдар салуға, қолда бар спорт алаңдары мен құрал-жабдықтарды жақсартуға көңіл бөлуде. Әуесқой ойыншылар үшін жарысқа қатысу – денсаулықты нығайту ғана емес, ортақ қызығушылық арқылы жаңа достар табу, бос уақытты тиімді өткізу. Көптеген қатысушылар үшін лига – өз шеберлігін шыңдап, кәсіпқой футболға бір қадам жақындау мүмкіндігі.
Алдағы уақытта ӘФЛ аясында балалар мен жасөспірімдерге арналған секциялар, жаттығу бағдарламалары мен мастер-класстар ұйымдастыру жоспарланып отыр. Бұл жас буын өкілдеріне тәжірибелі бапкерлердің жетекшілігімен футбол негіздерін үйренуге, болашақта кәсіби спортшы атануға жол ашады. Лига менеджменті де өз жұмысын заман талабына сай жетілдіріп, демеушілер мен серіктестер есебінен мүмкіндіктерді кеңейтуге тырысуда.
Осылайша, Түркістан қаласында өткен ӘФЛ-ның 2024 жылғы күз-қыс маусымы – аймақтық футбол мәдениетін дамытудың жарқын мысалы. Болашақта да осындай турнирлер футбол әуесқойларын біріктіріп, қаланың, облыстың және тұтас елдің спорттық деңгейін көтереді деп сенеміз. Жеңіс пен жетістік – бір күннің жемісі емес, тұрақты еңбек пен ынтымақтастықтың нәтижесі. ӘФЛ – соның айғағы.
Пікір қалдыру